Select Menu

Slider

يتم التشغيل بواسطة Blogger.

Travel

Performance

Cute

My Place

Slider

Racing

Videos

» » رسالة للشعب المصري
«
Next
رسالة أحدث
»
Previous
رسالة أقدم

عزيزي المواطن المصري أنت تعلم ان أحوال مصر الحالية لا تسر عدو ولا حبيب، وتعلم جيداً ان إنتشار الفساد والظلم والفقر والقهر والتعذيب هو الدافع الرئيسي لتبنيك مقولة "البلد دي بتاعتهم مش بتاعتنا" لكن الواقع يا أخي في الوطن ان البلد دي بتاعتنا إحنا مش بتاعت الحرامية واننا مسئولين كلنا عن مصر وان تفريطنا في اننا ندافع عن وجودنا وعن حقوقنا هو اللي مكن الحرامية من السيطرة علينا وعلى مصر

عزيزي المواطن المصري لو إستمريت في سلبيتك وسكوتك وصمتك يبقا بتساعد اللصوص على الإستمرار في سرقة ثروتك القومية وتحويلها لحساباتهم في البنوك الأجنبية، ولو إستمريت في ترديد أفكار الخنوع واليأس والإحباط يبقا بتساعد الحرامية على الإستمرار في شفط ثروات بلدك اللي هي ثرواتك واللي المفروض ان لك نصيب معلوم فيها لكن سكوتك ويأسك هيضيعوا حقك وحق بلدك

عزيزي المواطن المصري لازم تبقا ناصح وذكي ولازم تبطل ترديد الكلام اللي بينشره جواسيس اللصوص بين الناس ولازم تبطل ترديد الأفكار اللي بترسخ اليأس والإحباط في نفوس الناس، عايزك تصحى معايا وتركز في اللي هقولهولك

عزيزي المواطن المصري منذ هذه اللحظة توقف تماماً عن ترديد هذه المقولات "البلد دي مفيهاش قانون والغلابة بيتبهدلو في المحاكم سنين طويلة وبرضه مفيش حد منهم بياخد حقه، إحنا في زمن الباطل والأخ بياكل حق أخوه والواد بيرمي أمه وأبوه في الشارع عشان يتجوز، ما عدش حد عنده ضمير، الناس بقت أخلاقهم وحشة، مفيش حد من المسؤلين عنده إستعداد يتغير لأنهم مستفيدين من الوضع ده" الكلام ده بينشر اليأس وبيرسخه في نفوس الناس ولازم تبطل ترديد هذا الكلام فوراً

عزيزي المواطن المصري لازم تردد الكلام ده "لازم نتغير ونغير على بلدنا، لازم نوقف الظالم عند حده، لازم نتظاهر ونرفض الفساد ونرفض التعذيب في أقسام الشرطة، البلد دي بتاعتنا احنا مش بتاعت الحرامية اللي مكانهم السجون، لازم نقف مع بعض ونحط ايدينا في ايدين بعض"

عزيزي المواطن المصري عايزك تبطل تردد الجملة دي "إن الله إذا غضب على قوم ولى عليهم شرارهم" لإنها بتدي شرعية للأشرار اللي بيحكمونا وبتخلي الناس تؤمن بالإستسلام لهم لأن الله بحسب هذه المقولة هو من فرضهم على الشعب

عزيزي المواطن المصري ممكن تسترجل شوية وتبطل جبن وياريت تبطل ترديد المقولة دي "محدش يقدر يقول للغول عينك حمرا يا غول" وخليك جرئ وقول للغول عينك حمرا وقول لإبنه القرد خدودك حمرا يا قرد وخليك جدع ومشيها خدود القرد

عزيزي المواطن المصري لازم تهتم بالسياسة ولازم تنضم لأي حزب أو حركة أو جماعة وتبقا عضو نشيط معاهم وعايزك تبطل تفاهة وتبطل تشجيع كورة لأن ده هو اهم سبب يجعلك تنزوي وتنطوي على نفسك، انت بتلجأ لتشجيع كرة القدم كوسيلة للهرب من الواقع لكنك بهذا الهروب تتخلى عن مسؤليتك تجاه نفسك وأسرتك وبلدك، إسترجل وبطل تشجيع كورة مؤقتاً لحد ما نغير النظام الحالي ويبقا عندنا دولة محترمة ساعتها ابقا ارجع تاني شجع كورة زي ما تحب

عزيزي المواطن المصري عندك أحزاب وجماعات كتيرة شوف الأقرب منهم لنفسك وإنضم لهم وياريت لما تبتدي تمارس السياسة تبعد عن الفردانية والأنانية وعايزك تفكر في صالح المجتمع كله وفي صالح مصر كلها مش في صالح نفسك أو حزبك أو جماعتك وإتعلم من الإسرائليين شوف كلهم على قلب رجل واحد إزاي وحاطيين مصلحة بلدهم ومصلحة الشعب الإسرائيلي فوق كل الإختلافات الحزبية

عزيزي المواطن المصري عايزك تسترجل وتبطل خوف وتبتدي من النهاردة إنك تنضم لأي وقفة إحتجاجية تنظمها المعارضة ولأي مظاهرة تنظمها المعارضة، خايف من إيه؟ ماحدش بيموت في مظاهرة، وانت خايف من الموت ليه هو انت أساساً عايش ولا حد حاسس بوجودك!!!!، خايف من ايه؟ خايف تتخرشم طب ما أنت كده كده متخرشم ومتبرشم ومتشألط ومتبألط ليل نهار في زحمة المواصلات وفي طوابير العيش وكده كده ميت بفقرك وجهلك او ميت بالتيفود لو شربت مية الحنفية اللي الحكومة بتلوثها بمياة المجاري عشان تخلص مني ومنك ولو متخلصناش من مبارك وعصابته يبقا الموت والذل والفقر هيتكتبو علينا للأبد

عزيزي المواطن المصري لو ما إتغيرتش يبقا مش هتقدر تغير الوضع المنيل بستين نيلة اللي انت غرقان فيه وهتفضل عايش طول عمرك تندب وتولول زي الحريم

عزيزي المواطن المصري الحل بإيدي وإيدك ولو وقفنا مع بعض تأكد محدش هيقدر علينا لان الحكومة معندهاش سجون تحط فيها التمانين مليون مصري والحكومة معندهاش رصاص يموت التمانين مليون مصري والحكومة معندهاش الجرأة انها تتحدى التمانين مليون مصري لو استرجلو ووقفوا وقفة رجالة
حسام عامر

About حسام عامر

إسمي حسام السعيد محمد عامر كاتب ومفكر ثوري حر ويمكنك التعرف اكتر علي من هنا
«
Next
رسالة أحدث
»
Previous
رسالة أقدم

9 comments

  1. يا حسام كلامك معقول ومنطقي بس كل واحد فينا فيه اللي مكفيه
    يعني عندك واحد زيي المفروض انه لسه مكملش 25 سنة بس شايل هموم راجل عنده 95 سنة مريح
    ابعتلي لينك التاج عشان ابقي اشوفه يا باشا
    تحياتي

    ردحذف
  2. والله يا استاذ حسام انت جبت المفيد ورسالتك دي هي الحل لكل مشاكلنا وياريت ننفذ كل الي قلتوه في الرسالة ونسترجل زي ما حضرتك دايما بتقول في مقالاتك

    ردحذف
  3. يسلم فمك بس تفتكر اننا ممكن ننفذ الكلام ده ونسترجل زي ما قلت ولا هنفضل جبنا

    ردحذف
  4. اود ان اعرف كيف اصبحت بهذه الشجاعة وهل ستستمر على هذا المنوال

    ردحذف
  5. مساء الخير
    احييك على رسالتك اولا و اتمنى ان يسمع الشعب و ان يعى وبرغم اعجابى بالمحتوى العام لرسالتك لكن لى تعقيبين اولا المصيريين ليسوا بجبناء و لم يكونوا كذلك يوما و هذا لا يعنى ان بالفعل هناك من يملك كلمة الحق و يخشى ان يقولها لأنه يخاف على نفسه وعلى "عياله" و طبعا فيه الكلمة الشهيرة "انا عندى عيال عايز اربيهم"
    انما فيه ناس كتير عندهم كم رهيب من اللامبالاه و فضلوا تسيير حالهم بالرضا و القناعة و الواحد منهم يكفيه انه يحصل على اقل القليل و ميعترضش دول بقى تقولهم ايه؟
    بالنسبة لحكاية ان لازم الواحد يمارس السياسة و ينضم لحزب انا اختلف معك اختلاف شديد اولا السياسة دى تشبه العمل العام و ده يستلزم قدرات و امكانيات غير موجود عن قطاع كبير من الناس
    انا اتصور ان السياسة فرض كفاية يعنى لو قام بها بعض "الشرفاء" وبدون تضليل و تغييب للبقية فهذا يكفى
    و بعدين يا اخى السياسة فى اغلبها لعبة قذرة حتى فى افضل الدول من حيث الديموقراطية تتدخل الاهواء الشخصية مرة لتحقيق نجاح لمرشح بعينه او لتضليل الرأى العام لابعاد نظره عن مرشح او حزب بعينه

    و اخيرا و ليس آخرا اتمنى ان رسالتك كانت تحوى تنبيه عن الاعلام لانه اخطر وسيلة يمتلكها النظام بل و اخطر وسيلة امتلكت يوما و الى في ايده اعلاه قوى واثقه انه ظاهر على خصومه

    اتمنى ان تعليقى يكون خفيف على قلبك و احييك على التدوينة دى و بعض التدوينات الاخرى و ان كان لى تحفظ على بعض الالفاظ العامية

    مع خالص تحياتى
    م/ هبه
    فتاة من صعيد مصر

    ردحذف
  6. مايكل
    ازيك يا مان معلش ما هو صحيح كل واحد فينا فيه اللي مكفيه بس لازم برضه نعرف مين السبب في إلهائنا بالمشاكل ولازم نتنبه لمخاطر سلبيتنا وإنكفائنا على ذواتنا مش كده ولا ايه
    هحط رد في مدونتك وهحط في ردي اللينك بتاع اسئلة التاج

    ردحذف
  7. غير معرف الأولاني وكمال
    منورين المدونة وطبعاً في أمل نسترجل ونتغير بس لازم ننشر الأفكار دي بين الشعب وهمتكم بقا في نشر الرسالة دي بين الناس بكل الوسائل الممكنة
    تقبلا تحيتي

    ردحذف
  8. غير معرف التاني
    منور يا مان وإتطمن أنا معنديش حاجة أخاف عليها زي معظم شعب مصر وحتى لو كان عندي حاجة برضه حبي لبلدي ورغبتي في أن أراها بأفضل حال هيدفعوني لأن أقول للغول عينك حمرا يا غول
    تقبل تحيتي ومودتي

    ردحذف
  9. Hoppa أو م/ هبة
    أهلا بيكي ونورتي المدونة وأسعدني تعقيبك اللي فيه إثراء للمقال وبالنسبة للألفاظ معلش تحمليني شوية وأعتذر لكي ولكل حد إتضايق من بعض الألفاظ وتقبلي تحيتي ومودتي

    ردحذف