الحقيقة اللي يمكن تزعلك من نفسك، بعد ما هتزعلك مني أنا في الأول.
احنا مش بس عندنا شك في نوايا المجلس العسكري، احنا متأكدين انهم بيخططوا لعدم تسليم الحكم، وبيخططوا لعدم بناء دولة ديمقراطية جديدة.
وحتى لو سلموا الحكم لحد هينقلبوا عليه بعد فترة قصيرة، وخليك فاكر كلامي كويس.
نرجع لمحاولاتهم لتأجيل تسليم الحكم بالمماطلة في اجراء انتخابات حقيقية نزيهة، وهيستخدموا الفتن الطائفية، وهيستخدموا الدلاديل الجدد، من الكتاب والسياسيين، والقوى السياسية اللي هتبيع مصر وشعبها وثورتها بشوية وعود على شوية فتافيت من التورتة، وفي الآخر هيطفحوهم كل الفتافيت اللي أكلوها.
......................
فتافيت التورتة هتكون مقاعد مجلس الشعب، معظمها للاخوان والسلفيين، والوزارة هتكون غالباً ائتلافية بين الاتنين بالتعاون مع كام ليبرالي ويساري انتهازي يبيعوا زمتهم بعضمة وفيلا في الساحل الشمالي، ومعاهم بعض الفلول اللي هيعملوا مصالحة غادرة مع الاخوان، وهينقلبوا عليهم بعد فترة وجيزة.
الفتافيت ستكون نفس الفتافيت التي كان مبارك يعطيها لحكومته، ولأعضاء حزبه، وهي عبارة عن شوية تسهيلات، على حتت اراضي، على توظيف لأقارب الاسلاميين، لكن سيظل العسكر هم المسيطرين فعلياً على السلطة من خلف الستار.
بالاضافة لما سبق، هيستخدموا عمليات الالهاء الديني، وأيضاً الإلهاء القومي، للتلاعب بعواطف الشعب، وإستغلاله في قضايا وهمية على غرار مسيرة فلسطين.
عسكر مبارك هيستخدموا اسلوب المسكنات الاعلامية، زي تجديد حبس مبارك ومراته في شيراتون شرم الشيخ، وتحديد وجباتهم بستة آلاف جنية فقط في اليوم، مع الاستمرار في نشر أكاذيب وترهات عن تدهور حالتهم الصحية والنفسية.
عسكر مبارك هيستمروا في دعم البلطجية لزعزعة الامن، عشان الشعب يكره الثورة، ويطلب ان الشرطة ترجع تاني، وتحمي الناس، لدرجة انهم هيجعلوا المواطن بذات نفسه هو اللي يقول ياريت الشرطة يرجعوا حتى لو هيعذبوا في أقسام الشرطة زي قبل يناير، المهم يخلصونا من البلطجية.
عسكر مبارك هيقمعوا البسطاء بالأحكام العسكرية الظالمة، عشان يخلو الشعب يكره الثورة، ويخلوا المواطن يكفر بالسياسة، ويتمنى ايام مبارك اللي ماكنش فيها احكام عسكرية غير للاسلاميين.
عسكر مبارك هيطلقو ايد الاخوان والسلفيين، عشان يكرهوا الشعب في الاسلاميين، عشان لما يجي عليهم الدور والعسكر ياكلوهم، هياكلوهم من غير ما تبكي عليهم عين.
وهيستمروا في رفع أسعار معظم السلع، خاصة الغذائية، عشان يجوعوا الشعب تاني، ويكرهوه في الثورة اللي اتسببت في زيادة الاسعار.
وهيستمروا في إعادة تجنيد اعضاء اللجنة الالكترونية، الذين يخلطون الاوراق ويضللون الشعب، ويتهمون من يفضح المجلس العسكري بأنه عدو للجيش المصري، وللأسف اينضم الاسلاميين لهذه اللجان الالكترونية، وكفرونا واتهمونا بالعمالة لاسرائيل، بكرة تندموا يا أغبياء.
وفوق كل ده عسكر مبارك هيفتعلو ازمات تافهة، ويسلطوا الضوء عليها اعلاميا لتضخيمها، حتى يكره الناس الثورة، ويعيدوا فلول مبارك للحكم.
عسكر مبارك هينقلبوا على الثورة، وهيقتلوا ويعتقلوا كل من يعترض عليهم، بعد ما يكونوا سحبوا التأييد الشعبي معاهم باعلام أشبه بسحرة الفرعون.
حتى الآن الجيش حاجة والمجلس حاجة تانية، وبلاش تبقا مغفل عشان هتندم وهترجع تاكل على قفاك لحد ما يبربأ، ولحد ما يبان لك صاحب، وكله بالمحاكم العسكرية، والشرطة العسكرية، والمجلس العسكري.
متبقوش اغبيا وشغلوا مخكوا ابوس ايديكوا، عشان ننجح ثورتنا ومنلبسش في الحيطة.
حسام السعيد عامر