Select Menu

Slider

يتم التشغيل بواسطة Blogger.

Travel

Performance

Cute

My Place

Slider

Racing

Videos

......
..
تعالى نتعاون مع بعض عشان مصر تكون دولة عظمى وغنية. إحنا مش أقل من أوربا . إحنا دولة عمرها أكتر من 7000 سنة حضارة

انت مش بلطجي ولا مجرم.انت مصري أصلي ودماغك توزن بلد. في الأول صلي على النبي. عليه الصلاة والسلام. نفسك تعيش في بلد تاخد فيها حقك تالت ومتلت وبالأدب. نفسك بلدك وحكومتك تحافظ عليك وترعاك وتوفر لك شغلانه شريفة وتاخد مرتب يكفيك ويغنيك عن الحرام. خليك معانا وانت هتعرف ازاي تحقق كل اللي نفسك فيه. بس الأول لازم تعرف مين اللي هيستفيد من الوضع الحالي ولازم تعرف ان الاسرائيليين الصهاينة يهمهم جدا ان مصر تكون دولة متخلفة وشعبها جاهل وفقير وبيضرب مخدرات ومقضيها نفحة من هنا ونفحة من هناك ولازم تعرف أن أسهل طريق لإستعبادك هو المخدرات والفقر والجهل. المخدرات دايما بتوهمك إنك فاهم أكتر من غيرك يعني بتخليك مقتنع بالجهل وبترفض انك تفهم الحقيقة اللي أخفوها عنك. ولازم تعرف ان الفقر بيخليك ضعيف وسهل ان واحد سارق فلوسك من سنين ويرجع تاني يأجرك بملاليم من الفلوس اللي سرقها من عرقك وشقاك عشان ينجح في انتخابات ويسرق فلوسك من تاني. أو يأجرك تعمل قلق وعوء في البلد عشان تفضل مصر متلخبطة ومفيهاش أمان. وده بيعطل اننا نصلح البلد ونعمل نظام سياسي ديمقراطي جديد يمنع اللصوص من انهم يسرقونا ويمصو دمنا. وطبعا انت عارف ان النظام الديمقراطي بيخلي الشعب هو الحاكم يعني الشعب لما بيختار رئيس تمام زي ما يكون بيعمل توكيل للرئيس ده بإدارة مصالح الشعب. لو عملت توكيل لمحامي وطلع ابن كلب حرامي ونصاب هتعمل فيه ايه؟. طبعاً هتطلع على جتته البلا الأزرق وهتاخد حقك منه. أهو في النظام الديقراطي الشعب يقدر يحاسب الرئيس والوزراء والظباط والقضاة زي الدول الاوربية وأمريكا. يكون في علمك النظام الغير ديمقراطي هو النظام اللي هيطبق الشريعة الاسلامية ويقطع ايدك لو سرقت ويرجمك بالحجارة لحد ماتموت لو اتقفشت وانت زانق الحتة بتاعتك في بير السلم. والنظام ده الشر بره وبعيد هيقفل القهاوي واللي مش هيصلي هيضربوه بالكرابيج في الشوارع كل ده بيتعمل في السعودية وإسأل أي حد راح هناك يعني لا سينما ولا تلفزيون وهتنام يا حلو من بعد صلاة العشا. ده غير انهم هينشرو الفتنة الطائفية ويزعلو اخواننا الاقباط منا مع العلم ان كلنا مصريين وكلنا ولاد تسعة وكلنا خلق الله وكلنا هنقف بين ايدين الله وهو بس اللي من حقه يحاسب البشر. اللي فات كوم واللي جاي كوم تاني لأن المصيبة الكبيرة ان النظام الغير ديمقراطي ده بيخلي الرئيس شخصية مقدسة يعني لا تقدر تشتمه ولا تقدر تعمل مظاهرة وتهتف ضده. تعرف ليه؟ لأن الرئيس في نظرهم بيحكم بأمر الله واللي يعترض عليه يبقا كافر لأنه من وجهة نظرهم بيعترض على خليفة الله. المصيبة الكبيرة ان لو الرئيس او ضباطه جلدوك او سرقوك لازم تصبر عشان ماتبقاش كافر لأنهم بيعتبرو ان اي معارضة للحاكم خروج من الاسلام. لكن النظام الديمقراطي يعطيك الحق انك ترفع قضية على الرئيس لأنه بني آدم عادي انت اديته توكيل يدير شئون البلد و لو كان ليك حق وكسبت القضية يبقا هتحبس الرئيس لو طلع هو اللي غلطان. النظام الغير ديمقراطي مفيهوش الكلام ده والرئيس المؤمن بتاعهم محصن تمام زي المجحوم مبارك قبل انا وأنت ما نخلعه ونحبسه. بإختصار النظام الديمقراطي يعني انت اللي إستأجرت الرئيس وانت اللي بتديله الأجر بتاعه يعني مرتب الرئيس بياخده من حقك في خيرات وثروات مصر لكن في النظام الغير ديمقراطي سواء ديكتاتوري أو ديني فالشعب مجرد عبيد عند الرئيس والعبد طبعا لازم يطيع خليفة الله عشان ميبقاش كافر. عموما النظام الغير ديمقراطي هيعتبرني ويعتبرك ويعتبر كل الشعب المصري كافر خصوصا اننا شعب بيحب يتريق على الحكام ويقول عليهم نكت . فيه حاجة تانية مهمة جداً لازم تعرفها ان مصر دولة غنية جدا بترول وغاز طبيعي ودخل قناة السويس وفوق ده كله مصر فيها مناجم دهب تسد عين الشمس في جنوب محافظة البحر الاحمر والثروات اللي في المناجم دي تخلي كل الشعب المصري عايش في نعيم. تعرف ليه مبارك كان مخبي علينا ان مصر فيها دهب. تعرف ليه مبارك كان بيسرق مصر وبيختار حرامية في كل المناصب سواء الشرطة او المحافظين أو القضاة أو الجيش أو الصحافة والتلفزيون. السبب ببساطة علشان انت وانا نكون فقراء ولما يحتاجو لنا يأجرونا ولما يستغنوا عنا يحبسونا في أقسام الشرطة ويلفقولنا القضايا سواء قضية برشام أو سلاح أو بنجو أو تحري ويذلونا ويعذبونا داخل أقسام الشرطة والنيابات والمحاكم عشان تفضل عيننا مكسورة ونفضل مسجلين عندهم يستدعونا لما يكونو محتاجين مساعدتنا في الانتخابات او للتظاهر ضد الشعب ونفضل دايما عبيد نرضى بالعضم اللي بيرموه لينا. خدها نصيحة من أهلك وناسك وجيرانك. اللي يبيع نفسه عشان الف ولا حتى خمس تلاف جنية يبقا يا إما عبيط يا إما مغفل وإنت مخك وعقلك يوزن كل أعداء مصر. لو بجد عايز تبقا انسان والدنيا كلها تحترمك لازم تبطل تضرب أي صنف. من النهاردة لا حقن ولا برشام ولا بانجو ولا حشيش ولا هوب هوب ولا اي صنف يخلي عقلك يتدمر. من النهاردة لو عايز عيالك اللي خلفتهم او اللي ناوي تخلفهم لو بجد بتحبهم ومش عايزهم يتعذبوا ويشوفو الشقا والمرمطة اللي انت شفتوهم يبقا لازم تبقا ايجابي وتتغير علشانك وعلشان مستقبل ولادك وبلدك. طريق الاستقامة مفيش أسهل منه. يعني أنت بتنزل من بيتك تلف وتتعب طول النهار مع صاحبك اللي بيزنق معاك عشان يساعدك تضرب بلاغ ولا تليس خنتريش ويا صابت يا خابت. أو بتنزل مع اتنين تلاتة تدخلو بنك وبعدين تخرجوا ورا مدعي وتحاولو تشكو الكاوتش بتاع العربية بتاعته وبرضة يا صابت يا خابت او بتنزل معاك بضاعتك بانجو مثلا ملفوف في باكتات وتبيع لزباينك ومعارفك وقرايبك وبرضه يا صابت يا خابت. المشكلة انك مش بتظلم غيرك وبتأذيه بس لكن انت كمان بتأذي نفسك. صحيح انت محتاج وظروفك ضنك وأشفور لكن ممكن تكسب من غير ما تأذي غيرك. لأنك لما بتتعسف يا معلم والحكومة بتقفشك كل اللي كسبته من النشل أو السرقة او التثبيت او الشك أو الهجم او من بيع المخدرات بتضيعه على المحاميين وعلى مصاريفك جوه الأقسام والسجن والنيابات والمحاكم ده غير انك بتبهدل اهلك معاك ولو ظروفهم صعبة بيضطروا يغلطوا هما كمان خصوصا الحريم عشان يتصرفولك في فلوس المحامي ومصاريفك في السجن. شفت انت بتبهدل نفسك وأهلك إزاي وشفت انك دايما بتخسر فلوسك وأعصابك وصحتك وكرامتك وعمرك وفوق كل ده بتبوظ بلدك وبتدي فرصة لأعدائك وأعداء مصر يشتروك ويأجروك. ايه رأيك تكسب من غير ما تتعسف ومن غير ما تخسر كرامتك. أنت طول عمرك مخك نضيف وممكن تفكر في طريقة تكسب رزقك بالحلال من غير ما تدي الفرصة للشرطة أو لأعدائك وأعداء مصر انهم يستعبدوك بصحيفة سوابقك. ممكن تشترى خضار او فاكهة أو ملابس وتفرش بيهم في منطقتك واللي يحاول يحاربك في رزقك ادفنه وقتي ومعاك الحق. ولو الشرطة عايزة تشيل فرشك يبقا يدولك وظيفة ومرتب يا إما يعملولك مشروع يا إما يبعدو عنك ويسيبوك تاكل عيش بالحلال. ممكن تخترع اي حوار انت دماغك مفيش زيها. المهم انك تبقى حر وتبطل مخدرات وبلطجة وإجرام عشان مفيش حد يستغلك من الصهاينة في مصر. أوعا تكون فاكر ان الاسرائيليين الصهاينة بيتكلموا عبري وان اسامهيم شارون وبارك ونتنياهو وبيريز. الصهيوني خبيث ومكار وممكن يكون مولود في مصر وبيتكلم زي وزيك واسمه مبارك او شفيق او سليمان او عز او نظيف او سرور او العادلي او غيرهم من عصابة الصهاينة اللي فقرونا وجوعونا وبهدلونا. والصهيوني الاسرائيلي هو أي حد بيجندك عشان تشتغل لحساب ناس تبع مبارك عشان تفضل مصر وشعبها تحت ايديهم. لازم تعرف ان مبارك وكل اللي كانوا بيشتغلو معاه كانوا فاهمين هم بيعملو ايه وبيخططوا عشان يستمروا في بهدلتي وبهدلتك وبهدلت شعب مصر. كل اللي عملوه كان عشان يأمنوا بلدهم اسرائيل وانت فاهم انهم كانوا اسرائيلين رغم كل المزاولات والاشتغالات اللي عملوها في التلفزيون وهما بيمثلوا علينا انهم بيصلو صلاة العيد كل سنة. مش ممكن مصري يعمل في بلده زي مبارك وعصابته ما عملو في مصر وفي شعبها. ده الكفرة والانجليز ماعملوش في مصر كده وإسأل العواجيز عن الخير اللي كان في مصر ايام زمان. مبارك لوث المية عشان ينشر فينا الفشل الكلوي وافسد الزرع علشان يصيب المصريين بالسرطان وكمان مبارك أمر العادلي بقتل الناس في الاقسام وفي المظاهرات. لازم كلنا نعرف مين عدونا ومين حبيبنا والكلام اللي قلناه لك دلوقتي لا هتشوفو في التلفزيون ولا هتقرأه في الجرنال لأن ببساطة مفيش حد يهمه انك تفهم سياسة صح. أغلب السياسيين كل همهم انهم يحكموك وخلاص ومن مصلحتهم انك تكون جاهل وفقير وعامل دماغ عشان يعرفوا يشتروك بالفلوس او يخدعوك بالكلام المزوق أو يعشموك بالجنة ونعيمها لما تقف معاهم على اساس انهم هما المسلمين وغيرهم اعداء الاسلام. إحنا أهلك وناسك ومش هنسيبك تقف لوحدك. إحنا كلنا إيد واحدة والشعب الواعي أقوى من أي حكومة ومن أي حد معاه فلوس أو سلاح. طبعا واضح جدا اننا منك وهمنا همك وطالما اقتنعت بكلامنا يبقا واجب عليك انك تنفذه وتقنع كل معارفك واصحابك بيه وتخليهم ينفذوه. من النهاردة انا وأنت وكل شعب مصر هندافع ونحمي مصر وثورتها. من النهاردة كلنا هنبقا أعضاء في المجلس الأعلى لحماية وتحقيق أهداف الثورة المصرية وهننشر الوعي السياسي بين الشعب المصري علشان كل مصري ياخد حقه من خير مصر

الله الوطن الشعب

اللجنة العليا

للتواصل مع عضو المجلس في منطقتك – أسم .......................... هاتف..............................


.........

نسخة بصيغة بي دي إف جاهزة للطباعة كي يتم توزيعها في الأحياء الشعبية والعشوائيات

رابط صفحة المجلس الأعلى لحماية وتحقيق أهداف الثورة المصرية على الفيسبوك