Select Menu

Slider

يتم التشغيل بواسطة Blogger.

Travel

Performance

Cute

My Place

Slider

Racing

Videos

عزيزي قارئ المدونة سوف أتوقف عن كتابة مقالي اليومي نظرا لظروف خارجة عن إراددتي وأسأل العلي القدير أن يكشف هذه الغمة وأعدكم بأن أبذل أقصى جهدي للعودة للكتابة مرة أخرى وفي حالة لم أستطيع تجاوز هذه الأزمة فإعلم أن لله الأمر من قبل ومن بعد والآن أترككم لقراءة آخر مقال كتبته وأتعشم أن لا يكون آخر ما تسطره يميني والسلام عليكم ورحمة الله وبركاته
.................
يوم 22 اكتوبر 2009 أي منذ ثلاثة أيام قام جمال مبارك بزيارة مسرحية لمحافظة قنا، تضمنت الزيارة تمثيلية هزلية لإجتماع مزيف بكومبارسات قاموا بأداء أدوار مواطنين في قرية الأميرية مركز أبو تشت، وبعد هذا جلس جمال مبارك مع طلاب جامعة جنوب الوادى جلسة حوار مفتوح والمفتوح هنا هو الحوار مش جمال عشان مخك ما يرحشي لبعيد

جمال ألقى كلمة قصيرة تهته خلالها ماشاء له أن يتهته ويريل كعادته ونتع تصريح قال فيه "من يتحدثون عن تراجع الدور المصرى فى المنطقة تفكيرهم توقف عند مرحلة الستينيات ويرددون «كلام إنشاء» ومصر لها احترامها فى العالم، وتلعب دوراً تاريخياً فى المنطقة وتنفتح على العالم الآخر" وأضاف "أن الحزب الوطني حريص علي إعادة التوزيع العادل لعائد الاستثمارات‏,‏ وتوجيهه بصورة أكبر لمحافظات الصعيد‏" ثم قال "أن شباب الصعيد سوف يشعرون خلال العامين المقبلين بثمار ونتائج الاستثمارات الجديدة‏ التي ستقررها الحكومة"

الكلام بتاع جمال تم نشره في الاهرام والمصري اليوم عدد 24 اكتوبر 2009، رغم اني عارف ان كل الشعب المصري فاقس وهارش تهافت تعلقات جيمي ابو قوصه أو «أوصه» لكني لازم أعلق على تصريحاته اللي بعتبرها مستفزة للغاية وتحمل بين طياتها مغالطات خطيرة للواقع والوقائع

جيمي ابو قوصه بيتهمنا كلنا اننا تفكيرنا متوقف عند الستينات وده اعتراف صريح بعظمة اداء مصر السياسي في عهد الرئيس الراحل جمال عبد الناصر، بداية عايز أوضح اني مش ناصري وبلوم عبد الناصر وبحمله مسؤلية وكسة 1967 وكمان بحمله مسئولية ما نحن فيه اليوم يعني لو كان سمع كلام الرئيس المحترم محمد نجيب وانشأ نظام ديمقراطي مكناش شفنا جيمي ابو قوصه سانن سنانه ومستني بفارغ الصبر الانقضاض على مصر ومصمصة عظامها بعد ما ابوه كلها لحم ورماها عضم، لكن رغم كراهيتي لإستبداد عبد الناصر لازم اعترف بانه عمل حاجات عظيمة في مصر ومنها دور اقليمي وعالمي كان بيرعب الصهاينة والامريكان رغم ضعف مصر عسكريا وقتها لكن سياسيا واقتصاديا كانت قوية بما فيه الكفاة ليكون لها ثقل عالمي، دلوقتي تقدر تقوللي فين دور مصر إقليميا في أفريقيا خصوصا في دول منابع نهر النيل، أعمامك الإسرائيليين سارحين هناك براحتهم مع ان النيل أمن قومي بينما أمن نظامكم أمن عائلي، ده الفرق بين نظام حكم بيستمد شرعيته من الشعب فبيشتغل لصالح الشعب بينما نظام حكمكم بيستمد قوته ووجوده من اسرائيل عشان كده مستسلم لها ومنبطح لها على طول الخط

نرجع لجيمي ابو قوصه ونقول له انت ازاي جالك قلب ياه وتقول اننا لينا دور تاريخي، تعرف انك كده بتعترف ان دورك الحالي بيعتمد على التاريخ والماضي التليد فقط، تعرف ان مصر بقت ملطشة للي يسوى ومايسواش عالميا بسبب سياسات باباك الهفأ، تعرف ان الاسرائيليين بيقتلوا جنودنا بمعدل عسكري كل سبعة ايام ويجرحوا جنودنا بمعدل عسكري كل اربعة ايام، تعرف ياه ان فاروق حسني خسر انتخابات اليونسكو لان مبارك عالميا يعتبر راجل هفأ مالوش لازمة ومالوش أي تاثير عالميا بسبب تردي أوضاع مصر الإقتصادية وبسبب ضعف جيشها وبسبب انبطاحها لأعمامك في تل أبيب وبسبب تبعية قرارها السياسي لواشنطون

جيمي أبو قوصه بيقول "ان الحزب الوطني حريص علي إعادة التوزيع العادل لعائد الاستثمارات" لأ ما هو واضح ياه، بأمارة 29 سنة وزعتوا فيها الفقر والجوع والمرض والذل والاعتقالات والتعذيب والزبالة والبطالة والفساد والمحسوبية والظلم على الشعب المصري بالحق والمستحق، لو كان ابوك محترم كان خلانا دولة محترمة وشعب محترم لكن الرئيس الهفأ يجيب لبلده اللعنة ويخلي شعبها هفأ عشان محدش يعايره، ابوك استلم مصر منتصرة في 1973 والنهاردة بيسلمها للي بعده خرابة ومرفوع عليها علم، توزيع عادل ايه ياه اللي بتقول عليه، مش عيب عليك تكدب يا بو قوصه، انت اتعديت من ابوك ولا ايه، ماتنزل ياه الشوارع بجد وتشوف نتيجة توزيعكم العادل لعائد الإستثمارات، إذا كان العائد كله بيدخل جيبك وجيب ابوك، والفتافيت الكبيرة بتدوها لعز ومن على شاكلته والفتافيت الاصغر شوية بترموها لشياطينكم وازلامكم ودلاديلكم بالاجهزة القمعية اللي بتحافظ لكم على نظامكم وبتعادي الشعب كله والفتافيت الاصغر بترموها لألاضيشكم في الوطني والمعارضة والإعلام، والشعب في الآخر مبيخدش غير قبض الريح

جيمي أبو قوصه بشر شباب الصعيد انهم سوف يشعرون خلال العامين المقبلين بثمار ونتائج الاستثمارات الجديدة، فعلا مش شباب الصعيد بس اللي هيحسوا بثمار الاستثمارات الجديدة، شعب مصر كله حاسس ومستكنيص من لذه الشعور بثمار الإستثمارات الجديدة، مصر كلها مش عارفة تودي جمايلك انت وابوك فين

أجمل موقف حدث لجمال أبو قوصه خلال الحوار لما سأله طالب " نفسى آخد طريقك وعايز أعرف وصلت إزاى؟؟ّّ لأنك مثل أعلى لى" ليه يا جيمي ما ردتش على سؤال الطالب وقلتله انا وصلت لأن بابا رئيس جمهورية ولان ماما قالتلي عايزاك تبقا رئيس زي باباك يا جيمي يا ننوس عين ماما، ليه يا أبو قوصه ما قلتش للواد انك خدت الطريق الصحراوي الخلفي اللي ورا ضهرك وده اللي وصلك للي انت فيه، ليه يا بو قوصه ما قلتلوش انا جيمي ابو قوصه ابن الأجرمين
حسام عامر