مأساة شعب النوبة بين الخرنج وإبنه السيس

تخيل انك تمتلك منزل، يطل على نهر النيل مباشرة، ومساحته 400 متر مربع، وملحق به حظيرة لتربية المواشي، وتخيل انك تمتلك خلف المنزل قطعة ارض زراعية، مساحتها بضع فدادين، من أجود وأخصب الأراضي الزراعية، وتخيل أن أرضك يحدها حزام من نخيل البلح الإبريمي الفاخر، وتخيل انك تعيش مع أسرتك في أمان تام، وبالقرب منك تنتشر بيوت أقاربك وجيرانك على طول النهر، من الآخر تخيل إنك عايش عيشة ملوكي، زرع وخضرة ووجوه سمراء حسناء وقلوب بيضاء.

 

النوبة

 

 

........................

إيه هيكون شعورك لو الحكومة أجبرتك انك تترك مزرعتك وبيتك المطل على النيل وإيه هيكون شعورك لو الحكومة رمتك انت وأسرتك في عمق الصحراء حيث لا ماء ولا أرض تصلح للزراعة، مش ده يعتبر قتل عمد، طب لو ده حصل لشعب كامل مش دي تبقا إبادة جماعية، كل اللي اللي ذكرته حصل أكتر منه لشعب النوبة

تعرف ايه عن النوبة، تعرف إنهم سكان مصر الأصليين، تعرف إن تاريخهم ضارب بجذوره في عمق التاريخ بحضارة موازية ومتشعبة ومتشابكة مع الحضارة الفرعونية القديمة، تعرف ان شعب النوبة رغم انه شعب مسلم ويتكلم اللغة العربية إلا إنه ظل محتفظاً بلغته حتى يومنا هذا، تعرف إن الجيش المصري إستخدم اللغة النوبية كشفرة عسكرية قبيل وأثناء حرب اكتوبر 1973، تعرف ان الاسرائليين فشلوا تماما في كسر هذه الشفرة ولم يعرفوا انها لغة الا منذ سنوات قريبة، تعرف اننا مديونين لشعب النوبة وللغة النوبية بنصر اكتوبر، تعرف اننا مديونين لشعب النوبة بدين أكبر مما تخيله لأنه على ممتلكاتهم ومنازلهم ومزارعهم ونخيلهم خزننا مياة السد العالي وسد أسوان القديم، تعرف ان نقطة المية اللي بتشربها دي بتوصلك لأن النوبيين تم تهجيرهم من بيوتهم لما السد العالي غرق قرى نوبية وشكل ما يسمى الآن ببحيرة ناصر، تعرف إنك بتشرب مية اتشرد بسببها شعب بأكمله

تعرف إن الحكومة المصرية منذ أكثر من قرن من الزمان تتجاهل الشعب النوبي وتتجاهل وجوده وتنكر بكل بجاحة أن في مصر أقليات عرقية، شعب النوبة هو شعب ذو أصول صافية نقية لأن النوبي لا يتزوج الا نوبية والعكس صحيح وهم خلافنا نحن المصريين أو الشعب الهجين لا تعرف الواحد منا أصله عربي ولا قبطي ولا تركي ولا كردي ولا يواني ولا ايطالي ولا فرنساوي ولا انجليزي ولا من يهود الدونمة زي خروفنا المعظم ساكن قصر العروبة وكوبري القبة وشرم الشيخ حاليا، تعرف ان الشعب النوبي تعداده أربعة ملايين ولا يوجد من يمثلهم في البرلمان

شعب النوبة شعب يعمل بالزراعة ويعيش على ضفتي نهر النيل منذ آلاف السنين وشعب النوبة أسلم بعد مقاومة عنيفة بعد فتح مصر واليوم شعب النوبة كله مسلم بعد أن دخل الإسلام بإرادته ويتميز الشعب النوبي بسمار بشرته المنتمية لجذور سكان قارة أفريقيا الأصليين، عندما زار مصر المؤرخ اليوناني (هيرودوت) وصف المصري القديم انه اسود البشرة أجعد الشعر يعني نوبي

عارف إن كتير من المصريين هيقولولي يا عم ما كلنا في الهوا سوا، شعب مصر كله بيتظلم من يوم مصر ما طلعت على وش الدنيا، كلامك صح لكن المشكلة إن الأقليات بيتظلمو ظلم مضاعف أو دوبل يعني بيتظلموا مرة زي كل الشعب ما بيتظلم وكمان بيتظلمو مرة تانية بصفتهم أقلية، طبعا الأقلية ممكن تكون أقلية دينية زي الأقباط والشيعة والبهائيين، وومن تكون أقلية عرقية او قومية أو إثنية زي النوبيين وزي بدو سيناء وزي عرب وبدو مطروح وسيوة، ومصر بكل فخر هي البلد الوحيد في الدنيا اللي الظلم الإجتماعي والسياسي فيها تقدر تعتبره سمة أساسية أو هو مرادف لكلمة مصر

ولأن الأقليات بتتعرض لإضطهاد واضح وصريح ولظلم مضاعف عشان كده دايما بنسمع شكواهم من الظلم والإضطهاد، الأقباط مثلا خلاص كرهوا الوضع الحالي وبيعتبروا ان كل المسلمين أعدائهم بسبب إن حسني مبارك ووزراؤه بيتسموا باسماء اسلامية وبيدعدوا زورا وبهتاناً إنهم مسلمين، كمان النوبيين على مدار القرن الماضي شافو ظلم يتجاوز الظلم اللي اتعرض له أقباط مصر لأن النوبي بنص الدستور لغته غير معترف بها، ولأن النوبي بنص الدستور شعب غير موجود في مصر، ولأن الحكومات المصرية المتعاقبة لم تكلف خاطرها وتحترم نفسها وتعلمنا في المدارس ان في مصر شعب اسمه الشعب النوبي وان له حضارة عريقة، لا في التاريخ عرفونا تاريخ النوبة القديم ولا في الجغرافيا عرفونا بجذور وأصول الشعب النوبي عشان كده ساعات كتير تقابل دكتور جامعي ولا كاتب صحفي ولا سيناريست يجهل أي شئ عن الشعب النوبي اللي شعب مصر بيسخر منه وبيتخيله شعب من البوابين والخدم، الحقيقة إن مفيش مهنة تعر صاحبها أو تقلل من شأنه والحقيقة إن النوبي النهاردة مهندس ودكتور ومدرس ومطرب وممثل ولاعب كرة واديب وصحفي ودول رباهم وعلمهم ناس بسطاء وفقراء وامناء ومحترمين عملوا فيما مضى في قصور باشوات ما قبل الثورة، وحاليا كل بوابين مصر من الفلاحين بلدياتي أو الصعايدة بلدياتي برضه لأن النوبي إرتقى إجتماعياً بعد أن اصبح متعلم

نرجع لمشكلة الشعب النوبي اللي بيطالب بأبسط حقوقه وهو حق العودة للنهر اللي عاش طوال عمره بالقرب منه، الدولة حاليا تقوم ببيع الاراضي المطلة على بحيرة ناصر للمستثمرين بتراب الفلوس بينما شاطئ البحيرة كله يعتبر حق لشعب النوبة اللي عايش طول عمره في المكان ده منذ بدء الخليقة، مبارك في آخر زيارة للنوبة وكعادته حب يعمل فيها فنجري بق ونتع تصريح أمر فيه الحكومة إنها تبني بيوت للشعب النوبي وتملكهم شاطي البحيرة، بعد كده الواد الفسل جمال هزء ابوه حسني ومسح بكرامته الارض وأثبت ان مبارك لا يحكم وانه مالوش لازمة زي قلته يعني أو في رواية أخرى شرابة خرج أو بإختصار خرنج، جمال لغى تصريحات ابوه الخرنج وأصر على بيع أراضي شعب النوبة لأصحابه وحبايبه من المنتفعين المتحلقين حوله واللي إنشاء الله هتكون نهايته على إيديهم

أي إنسان منصف لازم يتعاطف مع مطالب النوبيين العادلة في حقهم لإمتلاك أرضهم والعودة لشاطي النيل وتعويضهم عن أراضيهم الخصبة وعن سنوات المعاناة المستدامة التي عاشوا فيها أكثر من قرن من الزمان منذ أن بني خزان أسوان عام 1902 ومن حق شعب النوبة التمتع بثرواتهم ومن حقهم ايضاً الإعتراف باللغة النوبية في التعليم والمحررات الرسمية، على سبيل المثال الدانمرك فيها تعددية لغوية وعرقية و كذلك سويسرا وبلجيكا ومع ذلك لم تحدث أي مشاكل داخل هذه الدول بل شعوبهم عايشة في رفاهية يحسدهم عليها حتى الأمريكان، الحقيقة أنا متعاطف تماماً مع أي إنسان يتعرض للظلم وعشان كده انا مؤيد لحقوق الشعب النوبي في الحياة، من حق النوبيين إنهم ياخدوا حقوقهم المشروعة، ومن حقنا كلنا كمصريين أن ندرس تاريخ النوبة وجغرافيتها، ومن حق الطفل النوبي يتعلم لغته في المدرسة بجوار اللغة العربية، ومن حقنا كلنا كمصريين ان تكون هناك مساحة إعلامية متاحة للشعب النوبي، وأيضا من حق الأقباط والشيعة والبهائيين وبدو سيناء وعرب مطروح إنهم يطالبوا بحقوقهم المشروعة، وياريت كل مصر تتعلم تطالب بحقوقها في مصر سواء حقوق المواطنة أو تبادل السلطة أو حقوقهم في ثروات البلد اللي بتتشفط في كرش الخرنج و كرش إبنه السيس جمال و كروش عصابة الأربعة وأربعين حرامي
حسام السعيد عامر

.........
ملحوظة هامة
أنا مدين بالشكر للأستاذة وفاء عشري على تعريفي بمشاكل النوبة وعلى رسالتها التي أرسلت فيها روابط منتديات النوبة التي قرأت فيها تفاصيل مشاكل النوبيين في مصر
حسام السعيد عامر

Share شارك المقال مع أصدقائك :

هناك 12 تعليقًا:

  1. قلبي معاكم يا شعب النوبة وربنا يعينكم على مبارك
    قارءى من كرموز

    ردحذف
  2. مش عيب عليك تسب الريس مبارك والسيد جمال بالافاظ القذرة دي على فكرة انت انسان وقح
    قارئ من جهة امنية

    ردحذف
  3. عايزه اشكر اهل نوبة على وطنيتهم وانهم ضحوا كتير وسابو بلادهم ومزارعهم عشان مصر تخزن مية النيل وربنا يرجعكم لشط النيل تاني
    أم سمر

    ردحذف
  4. عم مرعي بتاع الكلماالخميس, أكتوبر 15, 2009 9:52:00 م

    فعلا الاقليات بينزل عليها ظلم مضاعف انا جاري مسيحي عشنا خمسة واربعين سنة جنب بعض بس للاسف هو النهاردة ابتدت معاملته معايا تتغير بسبب ان ابنه الصغير اترفض من النيابة بس حاولت افهمه اننا كلنا في الهم سوا قاللي ان الرفض كان واضح جدا انه لانه مسيحي يعني كانوا بيتعمدوا يفهموه انهم مسلمين ويلمحوله ان الدولة بتاعت المسلمين
    احنا نفوسنا باظت يا حسام يابني ومش هتتصلح الا اذا كان عندنا حكومة وطنية تعامل الناس كلها بالعدل بدون تفرقة بسبب دين او جنس او لون

    ردحذف
  5. برغم ان المقالة رائعة إلا إني اراك عدت لإستخدام الشتائم والالفاظ الخادشة للحياء ارجوك ان تخفف من غلوائك فإسلوبك ساحر وساخر بدون هذه الألفاظ وأرجو أن يتسع صدرك لهذا النقد وشكرا جزيلا على مجهودك الرائع وعلى وطنية افكارك
    دكتور عبد العزيز

    ردحذف
  6. إنت خسيس وخرنج يا حسام يا عامر

    ردحذف
  7. الديمقراطية هي الحل
    بدون ديمقراطية هنضل عايشين في ظلم وفساد للأبد
    واحد من مصر

    ردحذف
  8. تخيل اول مرة اعرف عن مشكلة النوبيين ... بلدنا على كده قايمة على الظلم من زمان... انا متعاطف مع اهل النوبة وموافق انهم يرجعوا لشاطي البحيرة كتعويض عن تهجيرهم لقرن كامل
    شكرا يا استاذ حسام حضرتك بتنورنا دايما وبتعرفنا خفايا بلدنا

    ردحذف
  9. جزيل شكري لك يا استاذ حسام على فكرك الراقي وعلى موضوعيتك وعلى إنحيازك للإنسان أيا كان دينه أو لونه
    إنت إنسان محترم واتمنى مصر يبقا شعبها كله زيك
    على فكرة يا استاذ حسام ياريت تحذف التعليقات اللي بيشتموك فيها ده لا يعتبر رد ده مجرد سب دون مضمون
    على فكرة رغم اني مش من مؤيدي البذائة لكن انا شايف ان السباب والشتائم تم توظيفها داخل المقالة بشكل جيد مش مجرد الفاظ دون هدف لكن برضه بضم صوتي لصوت كل اللي بيطلب منك تخف شوية وبلاش الالفاظ دي
    مهندس مينا عازر

    ردحذف
  10. نوبة ايه وزفت ايه دول عايزين يستقلو ويعملو دولة .. دول شوية اسرائيلين

    ردحذف
  11. اكيد انا باشكرك على عرضك لقضيتنا وزعلت لانك بردة مشيت اللى دماغك .... بس فعلا نفسنا نعرف كل الناس اللى حصل وبيحصل حتى الان لنا ... ويفهموا قضيتنا صح انها قضية عداله اجتماعيه ليس الا... مش عايزين نستق ولا احنا اسرائيلين احنا مصريين لاننا طول عمرنا عايشين على الارض دى احنا ماجناش من برة وقلنا عايزين نقعد هنا ... احنا حضارتنا اكتر من 5000 سنة على هذه الاراضى ... الكلام دة لكل ذى عقل وليس لكلاب الحكومة

    ردحذف
  12. الحقيقة لولا إن بلدنا تُدار كعزبة خاصة ما وجدنا تلك التفرقة والجور على الحقوق سواء لشعب النوبة وكذلك لشعب شمال سيناء فهم أيضا محرومون من الاهتمام ببناء البنية الحتية لهم وامدادهم بما يحتاجون من المواد التموينية للأسف يعاملون كبدو خارج حدود مصر ولهم من الشكاوى الكثير تقدر تقول إن شعب مصر كله يقول متى الخلاص مما نحن فيه
    وربنا يعجل بالفرج خالص تقديرى .
    نور الهداية

    ردحذف

أرشيف المدونة الإلكترونية

Recent Posts

سينما

مشاركة مميزة

من الذي اغتال الرئيس محمد انور السادات؟، هل نظرية المؤامرة حقيقة؟

من الذي اغتال الرئيس محمد انور السادات؟  هل نظرية المؤامرة حقيقة؟ سؤال ربما لم يخطر على بال أغلب المصريين، لأن كلنا نعلم ان من قتل السادات ه...