على عينك يا فاجر 2

أستحلفك بالله أن تقول لي رأيك في تصريحات مبارك لصحيفة القوات المسلحة، في الحوار الذي نشر أيضا في جريدة الأهرام، ما هو رأيك في قول مبارك، "إن أي قرار نتخذه هو لمصلحة المواطن المصري محدود الدخل‏,‏ فعندما يعرض علي أي اقتراح أو مشكلة أو مشروع قانون أسأل أولا عن مدي تأثيره علي المواطن البسيط وهل يسهم في تخفيف أعباء المعيشة عليه أم لا‏..‏ فالمواطن البسيط هو محور اهتمامي في التعامل مع قضايا الداخل وخلال زياراتي الخارجية‏..‏ أنا شخصيا أتابع معاناة الناس من الأسعار والمواصلات وتكاليف المعيشة يوما بيوم وأعي تماما شواغل الأسر المصرية في مواجهة مصاعب الحياة ومشكلاتها وتابعت علي مدار الساعة أزمة رغيف الخبز العام الماضي وأزمة الارتفاع غير المسبوق في أسعار السلع الغذائية الأساسية حتي تراجعت‏".

 

وبنا ما انا . دي أختي منى

 

.................

أنا عارف إن كتير من المصريين بطلوا يسمعوا خطب مبارك، وبطلوا يقرأوا الحوارات الصحفية، اللي بتعملها معاه الصحف والمجلات المصرية والعربية، بس بزمتكو ده كلام يخش عقل حد فيكو، أنا متأكد إن كل اللي بيقرأ إن مبارك بيتابع معاناة المصريين شخصياً، بيستغرب وبيقول الراجل ده جبلته إيه؟، وجنس أهله إيه؟، وشارب ومبلبع إيه؟، وهو بيقول الكلام ده.

مؤكد إن مفيش مصري هيصدق، إن مبارك هيساهم بأي شكل، في تخفيف اعباء المعيشة على المواطنين، عشان الأعباء دي لم تظهر غير في عهد مبارك، عمركو سمعتوا عن مواطن إنتحر، عشان مفيش معاه فلوس يشتري لولاده ملابس العيد؟، إلا في عهد سي حسني، عمركوا سمعتوا عن مصري يدفع مليون دولار لظابط أمن دولة سابق، عشان يقتل له عشيقته؟، اللي لهفت منه مليار جنيه وفرت منه، عمركو سمعتوا عن رجل أعمال مصري يحتكر سلعة ويرفع سعرها للسحاب، زي ما فعل أحمد عز؟، برعاية جمال ابن حسني، واللي كسبوا من الحديد أكتر من 11 مليار جنية مصري، من دم وعرق المصريين الطفحانين الكوتة، في الخليج وأوربا، عشان يرجعوا يبنوا لأسرهم بيوت يتستروا فيها.

المصايب دي ما ظهرتش غير في عهد مبارك، ومع ذلك قدر يتمطع وينتع شوية تصريحات تندرج تحت طائلة المسائلة القانونية، بإعتبارها نصب علني، أو بإعتبارها ترويج لأكاذيب معادية للوطن، وتهدم السلم الإجتماعي، أو يمكنك أن تعتبرها من قبيل الدعايات المغرضة، بزمتك منك له لها لهم لهن، أسعار السلع الغذائية إتراجعت زي ما بيقول الكذاب الأفاق ده؟، بزمتكو رغيف الخبز متوفر زي ما بيزعم المتخرص ده؟

وارجع تاني وأقول للمعارضة إنتوا فين من الكدب والخداع ده؟، ولماذا لا تمارسوا دوركم في فضح هذا الخنزؤور مدعي الديمقراطية؟، ومدعي الإهتمام بمصالح المواطنين زوراً وكذباً وبهتاناً، لو لم يكن لديكم إستعداد لممارسة المعارضة الحقيقية، طب ما تريحونا وتنضموا للحزب الوطني، أهو ساعتها هنعرف عدونا من حبيبنا، ونعرف كوعنا من بوعنا.

مش معقول الهزل اللي بيحصل في بلدنا ده، عندنا رئيس كذاب ومخادع، ومتعاون مع الأعداء وبيسرق ثروات الوطن، ومعادي لكل الشعب، ومع ذلك عندنا معارضة من نوعية رفعت السعيد، وباقي فصيل المتطرفين العالمانيين، اللي مركزين جهودهم فقط لمحاربة الإسلام، أو للهجوم على الإخوان المسلمين، بإعتبار أن كلاهما معادي لوجود العالمانيين، بينما وجودهم هم والوطن كله مهدد، من نظام حكم فاشي يتزعمه رئيس مستبد، وعميل للصهاينة اعداء مصر والعرب، وبجد عيب قوي عليكم تسيبوا الحمار وتتشطروا على البردعة.

وعلى الجانب الآخر هتلاقي داخل جماعة الإخوان، من يتبنى أفكار مضحكة تدعو للرثاء، مثلاً احد افراد الإخوان إقترح عليهم في أحد منتديات الإخوان، أن يداوموا على صلاة الفجر وقراءة القرآن للتغلب على نظام مبارك، وللتغلب على إعتقالات أمن الدولة، لأنهم لو فعلو هذا بحسب مزاعم هذا النعثل، سيصبحوا ربانيين لو أقسموا على الله لأبرهم.

طب ما تقسم على الله يا عم الدرويش المرجئ، وأطلب من ربنا يطلع إسرائيل من فلسطين، ولا أقول لك أقسم على الله يخلصنا من مبارك، ولا أقول لك أقسم على الله يداوي مرضى السرطان والفشل الكلوي والفيروس سي في مصر.

تخيل حجم الكارثة لو جماعة سياسية بحجم الإخوان المسلمين، تتجه للدروشة وتعتنق فكر المرجئين، بالله عليكم مش مكسوفين من نفسكوا، طب إتعلموا من تجربة الإسلاميين في تركيا وماليزيا، إزاي بعد كده نأمل إن الوطن يتصلح حاله، وإحنا معارضتنا لحد النهاردة مش قادرة تفهم يعني إيه سياسة، ويعني إيه ديمقراطية، ويعني إيه تداول سلطة، ويعني إيه مسائلة حاكم، ويعني إيه مطالبة بحقوق الوطن والمواطن.

إذا كان مبارك بيستخف بعقول المواطنين كلهم على عينك يا تاجر، لكن المعارضة المصرية كلها وعلى عينك يا فاجر، بتسلم لمبارك الوطن كله بغباء، يحسدهم عليه القاصي والداني.

يا أحزاب وقوى المعارضة المصرية، لازم تحددوا أولوياتكم، النهاردة لو لم تتحدوا وتطالبوا بعودة مصر للمصريين، ولو لم تنتقدوا إستعباط مبارك، وتفضحوا أكاذيبه، يبقا ياريت تنقطونا بسكاتكو خالص، وتقولوا انكو مش قد المعارضة، وخايفين من مواجهة مبارك وعصابته.

نرجوكم يا تعارضوا بجد، يا ماتعارضوش خالص، عشان نعرف راسنا من رجلينا، ونعرف مين معانا ومين ضدنا، ونرجوكم بطلو فهلوة، لإن السياسة ليست مجال للفهلوة.

اللهم قد بلغت اللهم فإشهد
حسام السعيد عامر

Share شارك المقال مع أصدقائك :

هناك 11 تعليقًا:

  1. عم مرعي بتاع الكلماالخميس, أكتوبر 08, 2009 6:02:00 م

    يسلم قلمك وفمك يا حسام يابني وربنا يجعل كل ما تكتبه في ميزان اعمالك

    ردحذف
  2. بجد انا مش عارف ازاي تكون عايش في مصر وتكتب بالجراءة دي رغم اعتراضي على بعض الكلمات والالفاظ لكن اعتقد ان مبارك يستحق كل الصفات والشتائم التي كلتها له

    ردحذف
  3. انت عايش في مصر يا حسام

    ردحذف
  4. استاذ حسام بجد كفيت ووفيت عظيم تقديري لشجاعتك

    ردحذف
  5. قلت كل الي نفسنا نقوله وخايفين نقوله

    ردحذف
  6. كل يوم اعجابي بشجاعتك بيزيد يا استاذ حسام

    ردحذف
  7. ثقافة+ذكاء+شجاعة+فصاحة بالعامية والفصحى+وطنية+تدين+احترام حق الآخر= حسام عامر
    مهندس مينا عازر

    ردحذف
  8. والله ما سمعت خطاب يوم 6 اكتوبر .. عادى حيكون فيه ايه يعنى

    تصدق انى بآجى عندك عشان افش غلى عشان انا مش شوووجاع زيك ..

    ردحذف
  9. على فكره ما حدش بيضحك على حد ولا احنا جاهلين .. وعارفين كل حاجه وفاهمين كل حاجه وعارفين الجد من الهزار والصياعه من الضياعه وكمان الكنبخه من الانتخه وعارفين كمان ارقص يا ميمون والقرد مخبى ابنه فين ... بلد شفلنجع بخ حب مكووووور ... يعنى ايه .. مش عارف

    ردحذف
  10. الاستاذ حسام عامر
    اكيد ان كلام المبجل كان على قلبهم زى السكر علشان كدة غلوة وخلو الكيلو ب 5 جنية .... تفتكر الغلبان هايقدر يشرب الشاى كل صبحية.... حسبى الله ونعم الوكيل
    وفاء عشرى

    ردحذف
  11. إن لم تستح فقل ما شئت
    :))
    قلبك ميت يا حسام
    تحياتي

    ردحذف

أرشيف المدونة الإلكترونية

Recent Posts

سينما

مشاركة مميزة

من الذي اغتال الرئيس محمد انور السادات؟، هل نظرية المؤامرة حقيقة؟

من الذي اغتال الرئيس محمد انور السادات؟  هل نظرية المؤامرة حقيقة؟ سؤال ربما لم يخطر على بال أغلب المصريين، لأن كلنا نعلم ان من قتل السادات ه...