Select Menu

Slider

يتم التشغيل بواسطة Blogger.

Travel

Performance

Cute

My Place

Slider

Racing

Videos

» » أحلى من الشرف مفيش يا آه يا آه
«
Next
رسالة أحدث
»
Previous
رسالة أقدم

بالامس سمعت في إذاعة القرآن الكريم تفسير آية «يَا أَيُّهَا الَّذِينَ آَمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ وَلَا يَجْرِمَنَّكُمْ شَنَآَنُ قَوْمٍ عَلَى أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ» وقد أقتنعت جداً بجدوى العدل في الحكم حتى على الأعداء، ومن هذا المنطلق قررت أن اتوقف تماما عن إساءة الظن بالريس مبارك وأيضاً سوف أكف لساني وقلمي عن ترديد أي أقاويل تظلمه أو تبخسه حقه

من اليوم لن أسمع كلام المغرضين الكارهين الحاقدين على مبارك وابنه جمال فهم اشرف من الشرف ,على رأي الممثل الراحل توفيق الدقن "أحلى من الشرف مفيش يا آه يا آه"، من اليوم لن أصدق كل ما يشاع بسوء نية عن فساد مبارك وولده وأسرته وآله وزمرته فهم قوم اطهار وأمناء ويتحطوا على الجرح يولع من شدة تأثير المادة المطهرة في مبارك وجمال، من اليوم لن أصدق ما يقال عن ان مبارك وولده وأسرته وشلته وأورطته دأبوا خلال الثمانية والعشرين عاماً المنصرمة على تجريف ونهب وشفط ثروات مصر ودخلها القومي لأن دخل مصر القومي منغنغنا ومخلينا عايشين ميت فل وأربعتاشر، ويكفينا جدا ان مبارك وشركائه نجحوا في جعل المحمول في يد الجميع بينما الخبز غير متاح وده دليل على اهتمامهم بنشر الحضارة والحداثة والتكنولوبيا والكمبيو طرطر والإنترنت والموبايل والإسـ إم إســ م الله عليه وعلى حواليه

من اليوم لن اصدق ما يردده الحاقدون المغرضون عن إستئثار مبارك بالسلطة بضم السين لا فتحها ولن أصدق مزاعم الحاقدين الذين يروجون ان مبارك يرفض تطبيق الديمقراطية بالعكس الريس مبارك يطبق ديمقراطية مصرية براند نيو سينيييه يا مونبيه لكن ديمقراطيتنا نابعة من خصوصيتنا ولأننا احفاد فرعون الذي قال لشعب مصر منذ قرون عديدة "وما أريكم إلا ما أرى"ثم لما لقاهم مستكنيصين دخل في المفيد وقال لهم "انا ربكم الأعلى" وده طبعا عشان إستخف بعقول قومه وهما من خفه عقولهم اطاعوه وآدي إحنا النهاردة بنطبق ديمقراطية مبنية على منهج فرعون الأوحد وحزبه الأوحد وولده الأوحد وانا مش شايف بروبلم مادام الشعب راضي ومبسوط وساكت

من اليوم سأنهر وأشجب وأدين كل من يردد امامي الامثال الشعبية التي إبتكرها المغرضين للنيل من الريس الطيب الحلو أبو عيون جريئة، سأشجب وأندد وأدين كل من يقول لي "لو عدا عليك تعبان فوته ولو عدا عليك حد من عيلة مبارك موته" ان هذا المثل معادي للمباركية على غرار معادة السامية لان هذا المثل يعطي صورة سيئة لمبارك وآله ويعتبر ان أذاهم وفسادهم أعظم ضرراً من أذى وضرر الثعبان

سأشجب وأندد وأدين كل من يقول لي "لو خدت من الكلب صوف يبقا هتاخد من مبارك معروف" إن هذا المثل يفترض ان مبارك ليس أهلا للمعروف ونسي مبتكر هذا المثل ان مبارك ذات نفسه معروف، معروف بإنه مبيعملش معروف في حد إلا لما يكون الحد ده من نسل إسرائيل

سأشجب وأندد وأدين كل من يقول لي وهو كاذب بالتأكيد "ان الناس قد سألو الشيخ الشعراوي رحمة الله عليه قبل وفاته عن مبارك وهل هو حلال أم حرام فرد عليهم الشيخ الشعرواي قائلاً ليس حلالاً ولا حراماً بل مكروه"، حرام عليكم بطلوا تشنيع بقا معقول الريس الامور المسمسم أبو وش سمح يكون مكروه طيب أستحلفكم بالله أن تنظروا لتقاطيعه الجميلة وأستحلفكم بالله أن تنظرو لجبهته الصافية وأستحلفكم بالله أن تنظروا لوجهه الصبوح واستحلفكم بالله أن تنظروا لعيونه العسلية المدخمسة، بزمتكم دي خلقه الواحد يبصلها ويكرهها حرام عليكم يا ناس يا ظلمه ده مبارك محبوب جداً حتى اسالو التمانين مليون اللي عايشين في مصر وإنتوا تعرفو قد إيه كل الناس نفسها تحضنه وتبوسه وتنـــ تيت من كتر حبها في الريس مبارك حبيب التمانين مليون

انا دلوقتي ضميري إستريح وحاسس براحة نفسية وبتقوى عارمة بعد ما اصبحت امارس العدل ولا يجرمني شنئان مبارك، وأحب اقول للريس هانت يا ريس فات الكتير و ماعاد إلا القليل وشوف أكتر من تمانين سنة عدوا عليك إزاي زي ما يكونو ساعة أهو اللي جائ تقريبا تلات ثواني قلبي معاك والله وأنا عارف انك كلها تلات ثواني وتقف بين إيدين ربنا وإنت كلك ثقة ويقين بأن الشعب المصري راضي عليك وهو اللي إختارك

أظن بعد ما أثبت لمبارك مدى حبي له ولإبنه ولأسرته فاقل مكافأة على الكلام الحلو اللي أنا كتبته في المقال ده هو أن يتم تعييني في لجنه السياسات ويدوني مصنع صفيح وأبقا الرجل التالت بعد جميل جمال وبعد عز ملك الحديد وأبقا أنا حسام ملك الصفيح لا مؤاخذة
حسام عامر

About حسام عامر

إسمي حسام السعيد محمد عامر كاتب ومفكر ثوري حر ويمكنك التعرف اكتر علي من هنا
«
Next
رسالة أحدث
»
Previous
رسالة أقدم

5 comments

  1. عم مرعي بتاع الكلماالأربعاء, أغسطس 26, 2009 10:47:00 م

    أظن بعد ما أثبت لمبارك مدى حبي له ولإبنه ولأسرته فاقل مكافأة على الكلام الحلو اللي أنا كتبته في المقال ده هو أن يتم تعييني في لجنه السياسات ويدوني مصنع صفيح وأبقا الرجل التالت بعد جميل جمال وبعد عز ملك الحديد وأبقا أنا حسام ملك الصفيح لا مؤاخذة
    ههههههههههههههههههههههههههههههههههههههه
    قال ملك الصفيح قال ... ربنا يحظك يا حسام يا ابني والله موتني من الضحك.. عايز تهئهم وتبعتر كرامتهم وفي الاخر يخلوك ملك الصفيح دول مش بعيد يحطوك في صفيحة جبنة ويدفنوك في حديقة القصر الجمهوري..

    ردحذف
  2. أنا كمان لن أشنع على مبارك ومش هصدق انه بيتعمد يفقر الشعب المصري ويلهيه بالجري ورا لقمة العيش ويجريه بالجري ورا النسوان بعد اما ما بقاش حد قادر ماديا انه يتجوز وفعلا مبارك وعيلته اشرف من الشرف يا اه يا اه

    ردحذف
  3. و الله العظيم انا بحسدك على شجاعتك يا استاز حسام

    ردحذف
  4. انا بقيت مدمن كل يوم اقرا المدونة بتاعتك يا حسام بيه
    ربنا يزيدك شجاعة كمان وكمان

    ردحذف
  5. عجبتني جدا الحكمة الي بتقول لو عدا عليك تعبان فوته ولو عدا عليك مبارك موته

    ردحذف