Select Menu

Slider

يتم التشغيل بواسطة Blogger.

Travel

Performance

Cute

My Place

Slider

Racing

Videos

» »Unlabelled » يا ام المطاهر رشي الملح خمس فترات
«
Next
رسالة أحدث
»
Previous
رسالة أقدم

أرجوك وأتوسل إليك ألا تنفجر في الضحك عندما تعرف أن السفارة المصرية في واشنطن نظمت مظاهرة مؤيدة لحسني مبارك أثناء زيارته الحالية لأمريكا، تلاقيك بتستغرب مين المصري الابله المعتوه المتخلف عقلياً اللي عايش بره مصر اللي ممكن تبلغ بيه البلاهة والحقارة والغباء حد التظاهر لتأييد حسني مبارك رغم انه مفيش اي سبب منطقي يدعوه للنفاق فلا هو موظف ولا هو جاهل مهمش ساكن في عشة ولا في مقبرة ولا تحت كوبري هياخد عشرين ولا تلاتين جنية وعلبة كشري وزجاجة مية معدنية ويبوس إيده شعر ودقن ويحمد ربنا ان مبارك افتكره وبعت له حقه في الناتج القومي من الكشري ويتمنى من الله أن يحن عليه مبارك ويبعت له باقي حقه من الناتج القومي في قناة السويس والغاز الطبيعي والبترول وباقي ثروات مصر المشفوطة في كرش والينا المعظم

لكن عجبك وإستغرابك يا عزيزي لن يلبثا أن يتحولا ربما لحالة هستيرية من الضحك عندما تعرف بأن المظاهرة كان يقودها جزار مصرى مهاجر ويعمل أيضا فى مجال الموسيقى وعزف المزمار وإحياء حفلات الزواج والطهور وخلافة للجالية المصرية ومن ضمنها بالطبع السفارة المصرية اللي بين الفينة والاخرى لازم يتعملها حفلة زار أو مزمار أو مزيار أو زمبار أو زوار أو زرزار أو زيار زي زيارة مبارك الحالية لواشنطن

إمنعوا الضحك، مش فاهم إيه المشكلة إن جزار خارج في مظاهرة كقائد لها لتأييد زميله القائد في الوطن الأم وزميله في العمل الجزاري الطهوري، عايز أسمع سلام يا ام المطاهر رشي الملح خمس فترات، علماً بأن مصادر غير مسئولة قد صرحت بأن الإجتماع الذي تم عقده بين مبارك والجزار داخل مقر السفارة المصرية بواشنطون قد بين ووضح إلى أي مدى وصل التطابق في وجهات نظر الزعيمين القائدين بخصوص الطهارة والدبح خارج الشفخانة الوطنية

وبديهي ان السفارة المصرية في واشنطن سارت على نهج رجال مبارك وولده في مصر ونجحت في تجنيد شوية كومبارس على قد ما أوسوم بس مش بعشرين جنية طبعا، السعر بره مصر مختلف حبتين لأن السفارة دفعت لكل راس وقفت في المظاهرة ورقة بنيامين أبو شعر أبيض اللي هي ورقة بمائة دولار مقابل وقوف الكومبارس لمدة تزيد قليلاً عن ساعة

أعتقد دلوقتي إن من حق كل الكومبارس المحلي أن يطلبوا المساواة بكومبارس الخارج وأقترح عليكم يا كومبارس مصر أن تعملوا وقفة إحتجاجية للمطالبة بزيادة أجور وبدلات الإنتقال لمظاهرات التأييد المباركي المستأجرة، ويمكنكم ان تستخدموا سلالم نقابة الصحفيين بعد إستئذان السيد مندوب أمن الدولة في نقابة الصحفيين والنقيب في شرطة الصحافة مكرم محمد احمد وبرغم أنه منذ يومان رفض عقد حفل توقيع كتاب الدكتور عبد الحليم قنديل "كارت أحمر" إلا إني أحسن الظن بنقيب الشرطة قصدي نقيب الصحفيين الذي لن يبخل عليكم بدعمه وتأييده لمعرفته باهمية دوركم في تثبيت أركان نظام مبارك

وعلى جانب أجرى المذيع الأمريكي تشارلز روز لقاء مع حسني مبارك بثته بالأمس قناة "CBS" الامريكية قال فيه مبارك " إن الجدل الذى يثار حول ترشيح جمال مبارك للرئاسة الغرض منه البروباجندا الإعلامية وفرصة لتوجيه النقد الدائم للنظام المصري" وأضاف قائلاً "التوريث ليس في ذهني على الإطلاق" ثم أردف مبارك قائلاً " جمال لم يتحدث معي بشأن ترشيحه لرئاسة الجمهورية"، هنا يبرز سؤال أترك الإجابة عليه لفطنة القارئ والسؤال هو هل تعتقد بالفعل أن حسني مبارك قد قال الصدق والحقيقة للمذيع الأمريكي تشارلز رووز؟، أم أنه لا سمح الله كاذب في أصل وشه، وأنه لا سمح الله متورط حتى عنقه في التخطيط لتوريث ولده فلذه كبده ليحكم مزرعة الدواجن المصرية التي تتلمظ شوقا لان يتولاها جزار محترف اباً عن جد حسب ما يظن ويروج له خفية الاب والإبن والروح النجس رئيس واحد كل الناس به كافرين
حسام عامر

About حسام عامر

إسمي حسام السعيد محمد عامر كاتب ومفكر ثوري حر ويمكنك التعرف اكتر علي من هنا
«
Next
رسالة أحدث
»
Previous
رسالة أقدم

4 comments

  1. أين ذهب هذا المبلغ الضخم وهو " 130 مليار دولار" ؟.....؟

    فى حديثه بقناة الجزيرة فى سبتمبر الفين وأربعة قال الأستاذ محمد حسنين هيكل أنه خلال الثلاثين سنة الأخيرة حصلت مصر على 150 مليار دولارعلى شكل منح وقروض وهبات .. صرف منها حوالى 12 مليار دولارعلى مشاريع البنية الأساسية وستة مليارات دولارعلى مشروع مترو الأنفاق .. ومصيرالمبلغ الباقى غير واضح !!!! أين ذهب هذا المبلغ الضخم وهو " 130 مليار دولار" ؟.....؟

    ارجو من كل من يقراء هذا ان يزور ( مقالات ثقافة الهزيمة) فى هذا الرابط:

    www.ouregypt.us

    ردحذف
  2. استاذ حسام بجد مش عارف اقول لحضرتك ايه ... تعرف اني خلاص ادمنت قراءة مقالاتك .. فعلا ما جمع الا اما وفق جزارين بتأيد بعضيها وربنا يسترها علينا ويخلصنا من عصابة مبارك

    ردحذف
  3. مقال لذيذ ومووتنيييي من الضحك خصوصا عنوانه بالنوسبة لنهاية المقال عايزا اقول ان مبارك بيكذب في اصل وشه عشان كل تصرفاته من اول تعديل الكستور اصدي الدستور وتفصيله على مأس ابنه لحد سفر جمال مع ابوه حتى كمان الحوار المزور بتاع الفيس بوء كان محاولة عبيطة من جمال وفريقه لتلميعه ادام الشباب بس اللقاء فشل فشل زريع فزيع

    ردحذف
  4. عم مرعي بتاع الكلماالخميس, أغسطس 20, 2009 8:36:00 م

    ايه يا حسام يا ابني انت مش ناوي تقصر الشر وتجيبها لبر وتشيل مبارك من دماغك .. حرام عليك انت جرسته وفضحته فضيحة المطاهر يوم طلوعة عالمعاش ونكشت عشه وحطيت كمان الخيار في ... ايده كفاية بقا حرام خف شوية وكمان رمضان داخل علينا يا بكره يا بعده .. حقيقي معجب جدا بيك واتمنى لو كنت انا وولادي وشعب مصر بنفس شجاعتك وجرأتك ... ام العيال خايفة عليك قوي وبتدعيلك ان ربنا ينصرك ويعميهم عنك ويرد كيدهم في نحورهم شفت نتيجة الصدق والشجاعة ايه .. الناس بتحبك وبتدعيلك من غير ما يعرفوك .. اياك تتغير في يوم من الايام وتغير اسلوبك .. استمر في فضحهم بارك الله فيك

    ردحذف