السلطانية أحمدك يا رب

دبستني وورطتني السيدة الكريمة احلام جوليا صاحبة مدونة "المرأه قيثارة من لا يحسن العزف عليها تسمعه أنغاما لاترضيه" وأرسلت لي تاج الصداقة والتعارف، مش عارف ليه إفتكرت المقولة الإذاعية الشهيرة "السلطانية أحمدك يا رب" وإفتكرت يا ترى إنت فين يا مزنوق قصدي مرزوق، ما علينا مسيري أرد لها التدبيسة دي، المهم آدي أجوبتي على أسئلة التاج

من أنت ؟
أنا حسام عامر المواطن المصري البسيط اللي إبتلاه ربنا بنظام حكم من أحقر انظمة الحكم اللي عرفتها البشرية واللي طلع لقا نفسه عايش جوه مجتمع من اغرب وأعجب المجتمعات البشرية، على المستوى العام أكتر حاجة تغيظني هي الإزدواجية يعني الإنسان اللي يمثل انه متدين وهو من جواه فاسق والإنسان اللي يدعي الشرف والنزاهة وهو من جواه لص وخصوصا بقا الحاكم المستبد لما يتبجح ويتنطع ويستخف بعقول المصريين ويقول لهم "اننا نعيش أزهي عصور الديمقراطية" إلهي تتوكس على عينك يا كل من تمارس الإزدواجية، من كل فمي أقول لكل مصاب بالإزدواجية إسفوخس عليك وعلى اللي يصدقك، على فكرة أنا ولله الحمد ما عنديش أي إزدواجية على الإطلاق يمكن عشان أنا بعشق الرخامة والغتاتة وبموت في تعكير صفو حياة المصابين بالإزدواجية وبتمتع بإعلان سقطاتي وزلاتي، أهم صفة إتربيت عليها إني ما أضربش اللي أضعف مني وده كان درس خدته من أبويا لما رزعني علقة كسرت جوايا أي خوف من الل أكبر مني وأقوى مني كنت في تانية إبتدائي على ما أفتكر لما أكلت العلقة دي، عشت مراهقة طويلة شوية يمكن لحد ما بقا عندي سبعة وعشرين سنة وعشت تجارب متنوعة وثرية وخلال سنوات قليلة مريت بمواقف ما أعتقدش إن فرد واحد ممكن يمر بيها طول عمره وطبعا كل ده ما كانش بإيديا إنما كان بترتيب إلهي لسبب لا أعرفه المهم أكتر حاجة إتعلمتها إني أستمر في التعلم وان أتعلم من أخطاء الآخرين وأن أعتبر نفسي جاهل داخل مدرسة الحياة وأن اكون موضوعياً لأن ما إعتقدت بصحته معظم حياتي إكتشفت بعد ما نضجت إنه كان أكاذيب، أموت في القراءة وتقدر تعتبرني دودة قراءة أي حاجة تقابلني لازم أقرأها ودايما بستفيد من أي حاجة حتى لما قرأت في العالمانية والإلحاد إستفدت وحتى لما قرأت في الأحياء والهندسة الوراثية إستفدت وحتى لما قرأت عن نظرية النسبية إستفدت وحتى لما قرأت عن نظرية النشوء والإرتقاء لداروين إستفدت وحتى لما قرأت لعالم النفس فرويد إستفدت وحتى لما قرأت فلسفة نيتشة وهيجل وحتى لما قرأت لفولتير ولبلزاك ولسيمون وسارتر ولوك وروسو ولغيرهم إستفدت، رغم إني في النهاية لم يقنعني أي كتاب سوى الكتاب الذي لن يأتيه الباطل من بين يديه ولا من خلفه وهو الكتاب الوحيد الذي تكفل الله بحفظه من التزييف والتزوير والتدليس وبعد ما كبرت بلورت فلسفتي الخاصة في عدة نقاط أهمها إني عشان أعيش مرتاح البال لازم أعمل حاجتين، الحاجة الأولانية إني أحترم حق الآخر في الإختلاف وحقه في إبداء رأيه طالما يعطيني الحق في الإختلاف ويسمح لي بالتعبير عن الرأي ، الحاجة التانية إني لازم أضرب أي ظالم شلوتين على قفاه وأعتقد لو كل مصري عمل كده هنتخلص من الظالمين في نص ساعة تخيل كده حسني مبارك وجمال مبارك وعمر سليمان والنص مليون خنزير بتوع الداخلية والمخابرات واقفين في ميدان عام وكل التمانين مليون بيضربوهم بالشلاليت على قفاهم، ياه منظر في غاية السمو والرقي ويبعث في النفس نشوة لا تقل عن نشوة إستنشاق هواء البحر المتوسط الساعة واحدة بعد نص الليل على شاطي عجيبة في مرسى مطروح

ما الذي تفعله هنا ؟
بمنتهى الصراحة أنا هنا برد الظلم اللي إتعرضت له على إيدين مبارك وأنا هنا عشان أرد له الصاع تسعة مش صاعين، أنا هنا عشان أساعد الناس إنها تاخد موقف وعشان تسترجل وتبطل خوف، أنا هنا عشان أحاول قدر إستطاعتي التنغيص على مبارك وعصابته، أنا هنا عشان أحرض المصريين على مبارك وعصابته، أنا هنا عشان أشجع الناس تتصدى لمشروع التوريث أنا هنا لتوعية المواطنين وتفتيح أعينهم على خبث وتآمر وعمالة مبارك ولفضح محاولات دلاديل مبارك في إثارة الفتنة الطائفية بين المسلمين والأقباط، أنا هنا عشان أبستف وأهزأ وأفضح مبارك ودلاديله من رجال الأمن ولاعقي أحذيته من كهنته المنتسبين زوراً وبهتاناً للأزهر الشريف، انا هنا لفضح أي منافق ولتسليط الضوء على مشاكلنا وعلى إيجاد حلول لبعض هذه المشاكل لو عرفت أتوصل لحل لها، أنا هنا لقمة في زور كل ظالم وشوكة في تييييت أي طاغية، أنا هنا شلوت مزدوج على قفا طويل العمر عريض القفا الشهير بالبقرة الضاحكة

اسرائيل نفضت كل جنوب بحثاً عنك فأي شمال تقصد؟
فين السؤال ، أنا لو أحط إيدي على السؤال هجاوب علطول، واضح إنه سؤال مخادع

أنت مكلف بحذف حرف من حروف اللغة العربية أيها ستختار ولماذا ؟
أرفض هذا التكليف فلست مؤهلاً لهذا الأمر وإن كنت أعتقد أن حرفي الزاي ده (ز) والذال ده (ذ) متشابهان إلى حد كبير

لو قدر لك انك تدخل السجن ما هي القضية التي تتمني ان تدخله بها ؟
ده المكان الوحيد اللي مش ممكن أتواجد فيه أكتر من الأيام اللي ممكن يتحملها جسدي لما أضرب عن الطعام، أنا مش ممكن أعيش في السجن أبداً ده قدري ولا مفر منه حتى إسألو دلاديل مبارك

منذ متى اكتشفت نفسك ؟
الحقيقة أنا كل يوم جديد بكتشف في نفسي إمكانيات جديدة لإني كل يوم جديد بتعلم حاجة جديدة

على مفترق طريق لافتتان اليمنى تقول إلى حلمك واليسرى إلى ما لم يحلم به بشر أيهما تسلك ؟
اختار ما لم يحلم به بشر لأن حلمي بسيط جداً جداً ويمكني تطويعه دائما ليتناسب مع معطيات الواقع إنما ما لم يحلم به البشر ده بالطبع حاجة فللي قوي وأنا ممكن أترجمها إلى جنة عرضها السماوات والأرض اللي فيها مالا عين رأت ولا أذن سمعت ولا خطر على قلب بشر ودي بكل تأكيد صفقة في الجون

نحن لانعيش حياتنا بل نتعلم كيف نعيش ما تعليقك ؟
بالعكس أنا أفعل الإثنان في وقت واحد لأني أعيش حياتي بالشكل الذي يروق لي وأستفيد قدر الإمكان من الواقع المتاح مهما كان مقفراً وناضباً وأستطيع أن أطوعه ليناسب حياتي، وعلى الجانب الآخر أتعلم كيف أعيش في حياة كتبها الإله علي والمطلوب مني أن أخرج منها وقد أضفت لها ولم تنتقص مني

جملة واحدة اكتب تعريف للكلمات الأتية :
1- الوطن : هو المكان الذي نشأت وتربيت فيه
2- الأم : الأم مدرسة .. لعب وفن وهندسة
3- الليل : جميل خصوصاً على شاطئ البحر وجنبك نص بطيخة متلجة وقزازة مية نصها متجمد
4- الحب : ده بقا سبب شقائي لأني بموت في كل بنات حوا (( المعصعصين)) ههه بس انا دايما قوي الشخصية مع أي موززة ومش بحب غير اللي بتقول لي بموت فيك ههههه
5- أمريكا: دولة عظمى لها الحق في أن تنفذ أجندتها التي تخدم مصالحها رغم معارضتي لتيار الأصولية المسيحية الأنجلو ساكسوني المسيطر على الحياة السياسية هناك بنفوذه القوي المهيمن على حزب المحافظين ونفوذه شبه المهيمن على حزب الديمقراطيين وأتمنى أن تصبح بلدي مثل أمريكا وأن تنفذ أجندة تخدم مصالحنا
6- المرأة : نصف الدنيا
7- الصمت : الطريقة المثلى لإخفاء الجهل وعندما أكون جاهلاً بشئ ما فلا أنبس ببنت شفة وأنصت لكي أتعلم، وهو أيضاً الطريقة المثلى للشعوب الجبانة التي لا تجروء على مواجهة الحكام المستبدين
8- الانترنت : أحد أهم وسائل المعرفة وأحد أهم وسائل نشر الأفكار وأحد أهم الوسائل في التواصل البشري لكنه في دولنا العربية ومصر منها طبعاً هو فقط أحد أهم الوسائل لمشاهدة المواد الإباحية



قيس وعنتر وجميل هم الذين يقولون شعر وليلى وعبلة وبثينة صموت لماذا تغيب المرأة ؟
لأن الثقافة العربية منذ قديم الأزل وهي تستهجن بوح الأنثى بمشاعرها ويا عم كفاية قوي إنها تلمح لواحد بحبها له ولا تقوله بموت فيك يا مضروب وكده عال قوي إنت هتنهب

أن تكون مطلوباً في جريمة خير لك من ألا تكون مطلوباً مطلقاً هل تتفق مع هذه العبارة ؟ علل
لأ طبعا ده كلام يا راجل يا طيب حد يوافق على إنه يتبهدل ظلما وعدواناً طب ده أنا عامل المدونة دي مخصوص إنتقاماً من الظالمين، لا طبعا مستحيل إنسان عاقل يرضى إنه يتظلم إلا لو كان مازوخي

اين تمضي كلمات الحب بعد أن نقولها ؟
كلمات الحب تستقر في الوجدان وتؤثر على سلوكياتنا تجاه من نحب، تقدر تعتبر كلمة بحبك لغم مفخخ كامن في أعماقنا بمجرد ما تقعد قعدة رومانسية جنب الي قالتلك بحبك تلاقي اللغم ده إنفجر وإوعا وشك

هل تجد علاقة بين قطاع الطريق والمرأة ؟
أيوة الإتنين هيقلعوني الهدوم ههههههه

هذا فراق بيني وبينك لمن تقولها ؟
إلى كل دلاديل مبارك وإلى كل منافق لنظام مبارك وإلى كل معارض باع نفسه لنظام مبارك وإلى كل لاعق لأحذية الظالمين مقابل لقمة عيش أو حتة أرض أو مكسب مهما كان كبيراً على حساب المستضعفين من شعب مصر

كيف هو غداً ؟
لا يقنط من روح الله إلا الظالمين .. وكمان لا يأس مع الحياة . ولا حياة لمن تنادي .. ههه

لمن تمرر التاج ؟
أمرره لكل من ملكة بحجابي ومايكل و مسلمة من أرض المشرق وأحمد سعيد بتاع عنبر العقلاء
حسام السعيد عامر

Share شارك المقال مع أصدقائك :

هناك 6 تعليقات:

  1. روحك جميله جدايا استاذ حسام وبتتعجب ازاي اتكونت شخصيتك ووصلت لهذاا القدر من النضج

    ردحذف
  2. جميل
    بس ليا بعض الاعتراضات
    اولا المدونه جميله وبتدل على ان صاحبها جرئ ولا يخشى شئ
    على شمال المدونه لقيت من ضمن المواقع اللى بتابعها
    منتديات الشبكه الليبراليه السعوديه
    فهل تعرف ماذا تعنى كلمة ليبراليا وهل تعلم ان العلمانيين يفتخرون بكونهم ليبراليين ؟اريد اجابه
    اسلوبك بقى فى الرد على الاجابات هو حلو ودمه خفيف بس فى بعض الجاوزات مش بالنسبه للرئيس او زبالته او كده قصدى فى انك تقول كلمة موزه وماشابه من الكلام بس انا قريت المدونه كامله واستنتجت ان حضرتك شخص مرح وتعارض الحكومه بشده وانا عك وفى نفس الوقت لا تخشى شيئا وهذه صفات جميله
    اتمنى ان تتقبل مرورى وان تجاوب على تساؤلى فى الاعلى

    ردحذف
  3. غير معرف
    شكراً لإطرائك وبالنسبة لإزاي اتكونت شخصيتي فدي حاجة ماكانش ليا أي دخل فيها يعني ربنا خلقني كده والحمد لله على انه عملني كده عشان لو مكنتش بقيت كده كنت هموت نفسي عشان أبقا كده
    عموما كده كده تقبل تحيتي ومودتي

    ردحذف
  4. حواديت بنوتة
    بالنسبة لسؤالي عن الليبرالية فاحب احيلك لكام مقال هنا في المدونة عن الليبرالية
    ده مقال مبسط اسمه مؤمن وليبرالي وهم التعارض بين الليبرالية والإسلام
    http://shlotmozdwag.blogspot.com/2009/06/blog-post_13.html

    ده مقال الليبرالية الجديدة الطريق الثالث هتلاقي فيه تعريف بالليبرالية والفرق بينها وبين العالمانية
    http://shlotmozdwag.blogspot.com/2009/07/14.html


    ده مقال الليبرالية درب التحضر
    http://shlotmozdwag.blogspot.com/2009/07/blog-post_21.html
    لو قراتي المقالات دي كويس برح محايدة وبموضوعية هتعرفي يعني ايه ليبرالية
    ولو ما اقتعتيش بالمقالات فده حقك وطبيعي ان الناس تختلف عن بعضها وطبعاً انا مؤمن بحريتك بالإقتناع باي منهج يتوافق مع قناعاتك الشخصية
    تقبلي تحيتي ومودتي

    ردحذف
  5. استاذ حسام اخيرا قبلت التاج وجاوبت الاسئلة وباسلوبك المرح قدرت تطرق الى المواضيع السياسية اعجبتني رودودك المرحه

    ردحذف
  6. أحلام جوليا
    شكراً لتعقيبك والحقيقة ان التاج عجبني جداً وأسئلته في غاية الذكاء تحياتي لكي ولواضع هذه الاسئلة

    ردحذف

أرشيف المدونة الإلكترونية

Recent Posts

سينما

مشاركة مميزة

من الذي اغتال الرئيس محمد انور السادات؟، هل نظرية المؤامرة حقيقة؟

من الذي اغتال الرئيس محمد انور السادات؟  هل نظرية المؤامرة حقيقة؟ سؤال ربما لم يخطر على بال أغلب المصريين، لأن كلنا نعلم ان من قتل السادات ه...