الليبرالية درب التحضر

فكرة التسامح والاخاء بين البشر وحقهم في السعادة هي جزء من أفكار الليبرالية اللي من اهم مبادئها هي إن كل الناس سواسية ومفيش حد أحسن من حد وكمان حرية الرأي الفكري أو السياسي أو الديني هو أهم مبدأ من مبادئ الليبرالية، يعني تقدر تعيش حياتك بالشكل اللي إنت عايزه ومش من حق حد يعلقلك المشانق ويحاسبك طالما مبتضرش حد بفكرك أو برأيك، وفي الآخر اللي بيحاكم الناس هو اللي خلقهم، هي دي الليبرالية اللي بتساوي بين المسلم والمسيحي واللي مش مؤمن بأي دين خالص كلهم زي بعض أمام القانون، كلهم زي بعض أمام المجتمع كلهم زي بعض أمام بعض والمساواة هي أهم قيمة إنسانية لأنها تجعل الناس تحب بعضها وتجعل الناس لا تكره وتحارب بعضها لأن المسيحي لو فكر بطريقة انه هو الأحسن فسوف يكره المسلم، والمسلم لو فكر بطريقة إن كل الناس كفره وهو اللي على حق فسوف يكره المسيحي، والسني لو فكره بطريقة إن الشيعي بيشتم الصحابة وإن منهجه هو منهج الحق فسوف يكره الشيعي، والشيعي لو فكر بطريقة إن السني بيناصب على بن ابي طالب العداء فسوف يكره السني، والكره والكراهية تقوادان المجتمع للهاوية لأن المجتمع ينقسم على نفسه، بمعنى ان المواطنين في المجتمع ينخرطون في حرب داخلية تستنزف طاقة الوطن والمواطنين وتكبل مقدرة الوطن والمجتمع على التحضر والإنتاج والتمتع بالحياة لأن طاقات أفراد المجتمع وجهت لكراهية الآخر وبالتالي يظل المجتمع متخلف عن ركب الحضارة وهذا للأسف هو حالنا وحال كل الدول العربية، نفسي أشوف مصر أحسن بلد في العالم نفسي أشوف الشعب المصري أرقى شعوب العالم، نفسي أشوف الدول العربية أحسن دول في العالم نفسي أشوف الشعوب العربية أرقى شعوب العالم، ويارب يبقا كلنا بعد كده قلبنا على قلب بعض عشان نتخلص من الفقر والتخلف والجهل اللي إحنا غرقانين فيهم ونبقى زي دول العالم المتحضر اللي الناس فيها بتحترم بعضيها واللي الحكومات فيها بتحترم شعوبها لأن هذه الشعوب أساساً تجبر حكوماتها على إحترامها لأنها هو شعوب محترمة لا تفرض أراءها على الغير وتتيح لكل صاحب فكر حرية التعبير عن فكره، وإحنا كمان شعوب محترمة وهنقدر ننضف شوية العفار والتراب اللي مغطيين الحقيقة دي لإننا مش بس أقدم شعوب العالم لأ ده إحنا كمان اللي علمنا العالم الكتابة وعلمنا العالم البناء وعلمنا العالم الفلسفة وعلمنا العالم الرسم وعلمنا العالم الحرب وعلمنا العالم النظام وعلمنا العالم الحب وعلمنا العالم الجغرافيا، ولو مش مصدقين الكلام ده إخطفو رجليكم وإدخلو المتحف اللي في ميدان التحرير وإتفرجو بنفسكم إزاي أجدادكم في مصركانوا عايشين من أكتر من خمس تلاف سنة ويارب تبقا مصر أحسن بلد في الدنيا، ولو مش مصدقين الكلام ده إقرأو كتب التاريخ وإقرأو تاريخ العرب في الجاهلية وبعد الإسلام وستعرفون أننا كنا أصحاب ثقافة وشعراء وأصحاب مروءة وشجاعة وأخلاق حسنة وأننا علمنا العالم الحضارة بعلماء مثل إبن النفيس والمقريزي وإبن رشد والخوارزمي والحسن بن الهيثم والمسعودي وغيرهم من علماء العالم فيس كل فروع المعرفة، ويارب يعود للعرب عزهم ومجدهم ويستعيدوا مكانتهم العريقة
حسام السعيد عامر

Share شارك المقال مع أصدقائك :

هناك 6 تعليقات:

  1. مالك يا استاذ حسام النهاردة ايه الحكاية شوف هو حاجة من اتنين يا ما انت بتحب يا ما انت سخن وحرارتك مرتفعة شوية وفي الحالة دي اكشف على نفسك بسرعة اصل غريبة قوي الاستاذ حسام بيكتب عن اننا علمنا العالم وكتابته بتشع تفاؤل اننا نرجع زي الاول خير ده انت بقى لك يجي اسبوعين كل يوم تسودها في وشنا وتكتب عن الخنازير وجميع الحيوانات الي لوثت حياتنا وكمان اننا مستحيل ينصلح حالنا خير ان شاء الله شوية برد على خفيف ويعدوا

    ردحذف
  2. تفائل ايه وتشائم ايه بس يا ابني
    حكاية التشائم واتهامات الكتاب المحترمين بانهم بيبصو للسلبيات بس ده موال كل كلاب حسني
    الاستاذ حسام بيكشف لنا عن سلبياتنا وبيطرح حلوول لها يعني انسي يا عمر وسيبك من الافترا عليه
    خليك راجل طيب عشان نحبك

    ردحذف
  3. غير معروف اللي في أول رد
    إنت شايف إني بسودها في وشك بقا ده كلام يا راجل يا طيب ده أنا بشرح لكم الوضع وبحاول أثير فيكم الرغبة في تحدي الواقع المزري وتغييره
    إنت ليه بتتهمني بإني قلت إني مستحيل ينصلح حالنا هات نص أنا كتبته هنا في المدونة وفهمت منه أو إداك الإيحاء بده
    ما علينا أنا مقدر إنهم بيدفعوا كويس بس برضه لما تهاجم لازم تهاجم بعقلانية عشان تكسب إحترام المتلقي اللي هيقرأ كلامك
    ما علينا أبشر يا حبيب قلبي بأني سوف أستمر في التحريض على مواجهة الفاسدين
    أظن التحريض عمره ما هيعتبر إحباط ويأس زي ما كل دلاديل حسونة ما بيهاجمو الكتاب المحترمين زي إبراهيم عيسى وفهمي هويدي
    ما علينا المسامح كريم وأنا طول عمري أكرم من الكرم تعالى إتعشى معايا

    ردحذف
  4. غير معرف اللي في تاني رد
    أشكرك يا مان على دفاعك عني وتقبل تحيتي ومودتي

    ردحذف
  5. حتى انت يا استاذ حسام ما قبلتش الاختلاف في الراي واتهمتني انت والاخ غير معرف اني من كلاب السلطة
    والله بجد مكنش العشم خسارة
    كنت فاكراك مقتنع بكلامك عن الديمقراطية
    بس واضح ان الي معك يبقى ديمقراطي
    والي ضدك يبقى كلب سلطة كتر خيرك
    انا بقى الي بقولك واضح ان مفيش امل
    لان كله زي بعضه الي بنختلف معاه بنبقى اعداءه ومحدش بيقبل الاختلاف

    ردحذف
  6. انت بتعيط ليه يا حبوب لا مش من أولها كده .عاجباني مسكنتك قوي وكمان معجب ببكائك على حقوقك المهضومة في المدونة بقولك ايه ما تيجي أعشيك عشان تبطل تتهمني زورا وبهتانا اني بصادر رأيك واني مش ديمقراطي
    يابني انا سايبك تبعبع باللي في قلبك وممسحتش ردك ومديك كل حرية التعبير اهي .سيبك من الأونطة دي والاتهامات الملفقة مش هتاكل معايا ومعظم القراء فاهمين ملاعيبكم كويس

    ردحذف

أرشيف المدونة الإلكترونية

Recent Posts

سينما

مشاركة مميزة

من الذي اغتال الرئيس محمد انور السادات؟، هل نظرية المؤامرة حقيقة؟

من الذي اغتال الرئيس محمد انور السادات؟  هل نظرية المؤامرة حقيقة؟ سؤال ربما لم يخطر على بال أغلب المصريين، لأن كلنا نعلم ان من قتل السادات ه...