Select Menu

Slider

يتم التشغيل بواسطة Blogger.

Travel

Performance

Cute

My Place

Slider

Racing

Videos

» » تقرير مراسل حزب الغد من نيابة البساتين
«
Next
رسالة أحدث
»
Previous
رسالة أقدم

يوم الإتنين 29 يونيو صحيت من النوم الساعة تمانية الصبح وخرجت عشان أروح قسم البساتين، وصلت القسم وقابلت نفس النقيب الأسمراني بتاع ليلة إمبارح بعد نص الليل، طلب مني أسبقهم على نيابة البساتين في عرب المعادي، حاولت أسلمه حرز اللحمة اللي دبسني إمبارح فيه وخلاني أمضي على تعهد بإستلامه وتعهد بالحضور، رفض النقيب إستلام الحرز مني وتحجج بأن أسلمه لوكيل النيابة، الصراحة توجست بس مش خيفة إنما توجست من تصرفه الغير قانوني، منين طلب مني أن أحتفظ بالحرز بحجة عدم وجود تلاجة في القسم ( بعد تحريات قصيرة عرفت إن قسم البساتين فيه خمس تلاجات منهم واحدة نوفروست وديب فريزر وتلاتة كولدير)، خدت تاكسي وسبقتهم، وصلت عربية ترحيلات ووقفت قدام النيابة ونزل منها مساجين تبدوا على وجوه بعضهم علامات الإجرام بينما تبدو على وجوه العديد منهم ملامح البراءة واليأس في آن واحد، كلمت أمين الشرطة اللي شايل المحاضر وبيحاول يدي إيحاء بانه كالحمار الذي يحمل الأسفار ولا يدري مابها وسألته عن مكان تسليم الحرز فطلب مني أستناه في الدور التالت، طلع الأمين ودخل غرفة موظف الجدول يسلمه المحاضر وأخرج الناس من غرفة الجدول وأغلق الباب على نفسه هو وموظف الجدول بنيابة البساتين، خرج الامين وخرج موظف الجدول ومعاه القضايا وطلع على رئيس النيابة ونزل بعد ما وزع المحاضر سألته عن مكان محضر اللحمة فقال لي انه عند وليد سمير وكيل النيابة، طلعت وكلمت الحرس وفهمته ان معايا حرز قضية عند وكيل النيابة، طلب البطاقة قلتله عنده في المحضر، رفض الحرس إدخالي، إتنرفزت كده وكده على الحرس بصوت جهوري عشان أسمع معاون النيابة وليد سمير بالحكاية، فعلا فتح الباب بنفسه وعرفته بإختصار حكاية الحرز العجيب الي اتحملت مسئوليته القانونية، شوف الموحن والموهن بتاع الداخلية، المهم طلب مني أن أنتظر قليلاً، خلال ساعتين لم يدخل أو يخرج أي حد من غرفة وكيل النيابة وليد سمير يعني تقدر تعتبره "مساعد قاعد" أو تم إعفاؤه من العمل اليوم وتكليفه بأهم قضية تهم الدولة وهي قضية اللحمة المخنوقة والمرة دي هسيب ذكائك هو اللي يقدر مدى الموحن والموهن اللي وصلت ليه عقول رجال مبارك علماً بأن كمية المحاضر اللي كانت في نيابة البساتين في نفس اليوم اللي أنا كنت موجود فيه توحي بان سكان الحي مابيبطلوش مشاكل، وأنا قاعد على الفوتية الجلد الممزق المركون قدام مكتب وكيل النيابة أستنى إنه يضرب جرس زي باقي وكلاء النيابة في الغرف اللي جنبه مابيعملو أبداً، أستنى إن تدخل له قضايا أو مجرمين أو متهمين أو محامي أبداً ما حصلش، ساعتين فرمت فيهم الدستور والمصري اليوم وقربت أطلب مكتبة الإسكندرية تبعت لي حاوية كتب أتسلى فيها على ما يطلبني حضرة المبجل وكيل النيابة، المهم وقفت تاني وخبطت على باب مكتبه وفتحت الباب ودخلت بمنتهى الجرأة وقلت له " الحقيقة انا عندي مشاغل كتير قوي فمن فضلك لو سمحت ياريت تشوف المحضر بتاعي" لقيته بيقولي إتفضل إقعد، إندهشت من تغيره ودخلت وقعدت وسألني سؤالين تلاتة بسرعة وزي مايكون مجبر عليهم، جاوبته فطلب مني انتظر برة شوية وإداني البطاقة بتاعتي ومطلبش مني أمضي على المحضر لأن أقوالي ماتسجلتش والكاتب كان قاعد جنبه بيتكلم في الموبايل، فاكرين تعبير سلاحف الشرطة في التقرير السابق، نفس الجمود والبلادة نفس البطء واللامبالاة نفس الأخلاقيات والمبادئ الفاسدة، سلاحف النيابة لا يختلفون في المضمون عن سلاحف الشرطة، تقدر تعتبرهم ظباط شرطة متنكرين في ملابس مدنية، المهم خرجت من عنده وبعد ساعة كاملة خرج المحضر مع امين شرطة وأخد مني الحرز وقاللي ان قرار النيابة هو صرف الحاضر من سراي النيابة، وإرسال الحرز للقسم لإرساله لمفتش الأغذية أو شئ من هذا القبيل، المهم سلمت الحرز للأمين وطلبت منه رقم المحضر رفض زي ما رفض النقيب إمبارح إنه يديهولي يبدو أن هذه القضية سرية جداً وأنا مش واخد بالي، عملت نفسي مروح ونزلت على موظف الجدول جبت منه رقم المحضر وهو 11734 عام 2009 إداري قسم البساتين، على هامش مشاهداتي في النيابة، الحقيقة لم يختلف الأمر عن الوضع داخل قاعة النبتشية بقسم البساتين، معاك واسطة تقعد معزز مكرم والمحضر هيتسلق ولو خصمك معاه الحق كل اللي يقدر يعمله هو انه يقف في طرقة النيابة يدعي عليك وعلى واسطتك وعلى وكيل النيابة وعلى مصر كلها، قعدت أهدي الراجل المسن وأفهمه إن ربنا يمهل ولا يهمل بس الحقيقة معرفتش أقنعه أصل الخبال والفساد إستشرى في مصر بشكل يجعل الناس يكفروا بكل النصوص والمقدسات وإنا لله وإنا إليه راجعون، كان معكم حسام عامر مراسل حزب الغد . الدور الرابع . نيابة البسا... طين
حسام عامر

About حسام عامر

إسمي حسام السعيد محمد عامر كاتب ومفكر ثوري حر ويمكنك التعرف اكتر علي من هنا
«
Next
رسالة أحدث
»
Previous
رسالة أقدم

2 comments

  1. عايزه اسألك هي الحكايه ديه حصلت بجد

    ردحذف
  2. عايزه كمان اعرف عملت ايه في الاخر

    ردحذف