الصراع على عرش مصر

عشم إبليس في الجنة هو بالتأكيد مشابه لعشم عمر سليمان العشمان بالقوي، الراجل يا حبة عيني بيرسم على كرسي العرش بالشين مش بالسين، واللي مشجعه ومخلي العشم قاتله إنه عارف ومتأكد ان جمال مبارك لا يصلح لحكم مصر بحكم جهله السياسي وشعبيته المعدومة وتاريخه وتاريخ أبيه الذي أذاق شعب مصر الأمرين فقراً وفساداً وديكتاطورية من اللي وصى عليها اليماني، والعشمان بالقوي عمر سليمان بيروج إن القوات المسلحة ترفض جمال مبارك، طب ماهو كل المصريين يا عم العشمان رافضين وكارهين جمال مبارك، والقوات المسلحة هما إيه غير شوية مواطنين على شوية أفرولات على شوية دبابات على شوية مدافع على شوية حاجات فوق بعضيها، ومع ذلك ومع كامل تقديرنا وإحترامنا للتاريخ المشرف للقوات المسلحة المصرية ومع كامل إحترامنا للوطنيين الشرفاء المهمومين بقضايا ومشاكل وطننا مصر من جنود وضباط صف وضباط القوات المسلحة المصرية ، لكن لا ننسى أبداً التحول الكبير للدور الوطني للجيش المصري على يد مبارك الذي نجح في جعل زراعة الطماطم والأرز والقرع لتحقيق الإكتفاء الذاتي من أولويات الجيش الوطني على الرغم من أن هذا هو دور الفلاح المصري، وكذلك نجح في جعل القوات المسلحة تتوسع في إنتاج الخبز داخل أفران آليه تم تصنيعها بالكامل في المصانع الحربية رغم أن هذا هو دور أصحاب المخابز وعمال الأفران، وكذلك نجح في جعل القوات المسلحة تنمي وتطور وتمد خطوط التليفونات داخل مصر بأداء نافس بكل عزة وإقتدار كل مقاولي الأنفار في عموم القطر المصري، لكل ما سبق استأذن العشمان بالقوي وأقول له معلش يا عم العشمان بالقوي عندي شوية أسئلة رفيعة عالسريع وإنت عارفني غاوي أسئلة رفيعة، كانت فين القوات المسلحة لما كانت السفن والبوارج الحربية وناقلات الطائرات الامريكية تعبر قناة السويس تحت سمعهم وبصرهم وهي تتجه لغزو وضرب العراق الشقيق؟، كانت فين القوات المسلحة عندما أغلق مبارك معبر رفح في تحدي سافر وقبيح للإرادة الشعبية المصرية؟، وكانت فين القوات المسلحة بالسين مش بالشين لما مبارك حاصر الفلسطينيين ومنع مرور شاحنات المساعدات الإنسانية وصادر حمولاتها من الدقيق والأغذية والأدوية والشاش والقطن الطبي وضمادات الجروح؟، كانت فين القوات المسلحة لما إتعملت إتفاقية تصدير الغاز لإسرائيل؟، كانت فين القوات المسلحة بالسين مش بالشين لما الفساد السياسي والإقتصادي غرق مصر والمواطنين اصبحوا عالحديدة؟، كانت فين القوات المسلحة أيام إنتفاضة القضاة؟، كانت فين القوات المسلحة عندما عدل مبارك الدستور على مقاسه بناء على نصيحه واحد من المنافقين لما قاله يا ريس الدستور زي الكستور وبيتفصل بيجامات وجلاليب وإحنا لازم نفصل لفخامتك جلابية دستور؟، على الرغم أن صوف العسكري كان هيبقا أفضل جداً عشان الريس جلده تخين والكستور مش هيحوق معاه، وكانت فين القوات المسلحة من تجاوزات الداخلية مع المواطنين داخل أقسام الشرطة حتى أصبح هتك عرض مواطن على يد الشرطة خبر عادي جداً في مصر؟، كانت فين القوات المسلحة بالسين مش بالشين لما المخابرات العسكرية نفذت تعليمات عمر سليمان وحددت رتبة عقيد كحد أقصى لاي ضابط يرتبط بعلاقة نسب أو قرابة مع أي مسلم ملتحي أو مسلمة منتقبة؟ (مثلاً زوجة أخو الظابط ترتدي نقاب، أو أخت الظابط متزوجه من شاب ملتحي)، لو كانت القوات المسحة عملت إنقلاب بعد أي كارثة من الكوارث اللي أنا ذكرتها دي كنا كلنا هنقف معاها ونؤيدها بكل جوارحنا، إنما تسكت وتعمل ودن من طين وودن من عجين وتستنى أول فرصة حقيقية تتاح للشعب في إختيار حاكم وطني وتستغل الضعف اللي بتمر بيه البلد وتفرض رأيها على التمانين مليون مصري ساعتها كلنا هنرفض ده وهنقف ضده، معلش عندي سؤال رفيع قوي خالص مين إدى القوات المسلحة الحق في الوصاية على الشعب المصري؟، ياعم العشمان بالقوي ويا كل عشمان بالقوي من أفراد عصابة مبارك أحب أوضح ليكو نقطة مهمة قوي وعايزكو تحطوها حلقة في ودانكو، الشعب المصري واعي تماماً بكل ألاعيب أفراد عصابة الرئيس وأطماعهم وصراعاتهم على كرسي العرش بالشين والله العظيم مش بالسين، كلنا عارفين ان مبارك لا يقرب منه غير الإنتهازيين والمنافقين وبالطبع عمر سليمان منهم، وبكل تأكيد الشعب المصري لن يوافق على أن يسلم حكم مصر لأي فرد من أفراد عصابة مبارك، كفاية قوي بحور الفساد والفقر والتخلف والجهل اللي غرقتوا البلد فيها، يا عم العشمان بالقوي إوعا تخلي العشم يقتلك وإذا كنت نجحت تلبس مبارك السلطانية منذ حادث تمثيلية محاولة الإغتيال الوهمية في أديس أبابا لما إقترحت عليه يأخذ سيارة مصفحه ليركبها في أديس أماما ومن يومها وإنت دراعه اليمين مع إن المفروض إن مبارك يفقس التمثيلية العبيطة دي لأنه خبير في التمثيليات والأفلام فقد شارك في فيلم بالأبيض والأسود مع النجم كمال الشناوي وأيضاً شارك في فيلم المنصة عام 1981 هذا الفيلم الجماهيري الكبير الذي تكلف جهود وتخطيط وأموال طائلة على عكس تمثيليتك الساذجة الواضحه، يا عم العشمان بالقوي إوعا الشيطان يضحك عليك ويفهمك إنك ذكي لو كان عندك ذرة ذكاء حقيقي كنت عرفت إنه مستحيل تخدع كل الناس طول الوقت، عشان كده أنا كمصري حر مهتم بأن تتقدم مصر للأمام وكمصري حر أريد أن تسترجع مصر دورها القيادي الفعال في المنطقة وعشان أنا مؤمن بأن من الحق الشعوب أن تختار حكامها لا أن تفرض عليها الحكام بقوة السلاح وعشان أنا عايز مصر تنضف من المنافقين والإنتهازيين والمفسدين ولصوص المال العام، لكل ذلك أنا وكل مصري حر نرفضك ونرفض جمال مبارك ونرفض أي فرد من أفراد عصابة مبارك سواء كان يعمل بالجيش أو بالمخابرات أو بأمن الدولة أو بالشرطة أو بالحزب الوطني وكفاية عليكو لحد كده

حسام السعيد عامر

Share شارك المقال مع أصدقائك :

هناك تعليقان (2):

  1. معقول محاولة اغتيال مبارك في اديس ابابا كانت تمثيلية

    ردحذف
  2. اديني ضهرك يا جمال
    بدل ما يلبس ف وشك الشلوت

    ردحذف

Recent Posts

سينما

مشاركة مميزة

من الذي اغتال الرئيس محمد انور السادات؟، هل نظرية المؤامرة حقيقة؟

من الذي اغتال الرئيس محمد انور السادات؟  هل نظرية المؤامرة حقيقة؟ سؤال ربما لم يخطر على بال أغلب المصريين، لأن كلنا نعلم ان من قتل السادات ه...