إتنطرت مفزوعاً من سريري . لقد رأيت في منامي للتو كابوساً زلزل جوانب نفسي .. قال إيه خير اللهم إجعله خير .. شفت نفسي ماشي في بلد زيها الوطني هو الشوال الخيش البني ولما سألت الناس عن اسم بلدهم قالولي اسمها جمهورية خيبابني، وأثناء تجوالي في هذه البلد شاهدت في أحد الميادين الكبرى تجمع بشري كبير لسكان البلد وهم واقفون أمام مسرح كبير جداً ترقص وتغني عليه حتت مٌزَّةَ تخلي الأخرس ينطق وتحل من على حبل المشنقة، فسألت أحدهم عن إسم المٌزَّةَ فأخبرني أن إسمها سوزي مريحاهم وإن المطربة داليا تساهيل هتطلع بعد ما تخلص فقرة سوزي مريحاهم ودي أول مرة الإتنين يتجمعوا في مكان واحد والفضل للريس متلائم القط رئيس جمهورية خيبابني إكمنو وافق النهاردة على إستيراد التراب وعمل الحفلة الكبيرة دي إحتفالاً بصدرور القرار التاريخي العظيم بإستيراد التراب، تعجبت وسألت الرجل
- تراب إيه ؟!! التراب اللي بيبقى على الأرض ؟
- أيون
- لا هو أنتو في جمهورية خيبابني مفيش عندكو تراب ؟
- لا ماعندناش تراب خالص . بقالنا أكتر من شهر التراب خلص من عندنا
-هو التراب عمره بيخلص !!؟؟
- أصلنا كلناه
- أنتو بتاكلو التراب !!؟؟!!؟؟!!؟؟
- أيون
- أيون !!!!!!!؟؟؟؟؟؟؟؟؟؟!!!!!! إيه التخريف ده ؟
- أيون بناكل التراب بقالنا ميتين وتلاتين سنة
- هو في بني آدمين تاكل التراب !؟ الناس ياكلو عيش ياكلو خضار ياكلو فاكهة ... أو على الأقل ياكلو حلاوة ياكلو جاتوة وياكلو كل اللي يحبوه
- أنا سمعت من أبويا إن جده حكاله إنه سمع إن جد جد جدي كان بياكل الحاجات دي
- انتو وصلتو للحالة دي إزاي ؟
- من زمان قوي أمر رئيسنا بخلط التراب مع الدقيق في الأفران عشان يخفض سعر تكلفة رغيف العيش ومع الأيام زادت نسبة التراب وتوالت الزيادات لحد أما مبقاش في الرغيف غير جرام دقيق وتسعة وتسعين جرام تراب وبعد كده أصدر الرئيس قرار بأن الرغيف الصحي لازم تكون نسبة التراب فيه 99.999% والباقي تراب وأيده مجلس الشعب ولجانه الفرعية وأصدرت دار الفتوى بيان تؤكد إن ده هو الرغيف الشرعي وبعد كده إختفى الدقيق خالص من الرغيف وبقينا ناكل تراب وبس
- يعني كل سكان جمهورية خيبابني عايشين على التراب
- إحنا بنسمع إشاعات إن الريس والحاشية والوزرا والأغنيا بياكلو حاجات تانية غير التراب بس بيندفنوا بعد ما يموتو في التراب عشان يتساوو معانا
- يعني هما يندفنو في التراب وانتو عايشين على التراب
- مظبوط
- والنهاردة رئيسكم متلائم القط أصدر القرار
- مظبوط
- أهو اللي بيحصل لكم ده نتيجة إنكو سلمتو القط مفتاح الكرار فأصدر لكم القرار
وفجأة تعالت هتافات الجماهير ترحيبا بالمطربة داليا تساهيل وهي تغني النشيد الوطني لجمهورية خيبابني ومع إزدياد تراقص وتلوي داليا تساهيل إزدادت الجماهير هياجا وتراقصت طرباً وهي تشدو النشيد الوطني مع المطربة مرددين بحناجر ترابية " خيبابني يا أم الدنيا ... وسيرة شعبك ماليا الدنيا .... خيبا بني يا ست الناس ... ياللي نسوانك أحلى من الأناناس ... خيبابني ياخيبابني يا اقوى دولة يا خيبابني ... رجالتك هما اصل الحضارة وشعبك لون الأرض بني.
حسام السعيد عامر
* سبق ان نشرت هذه القصة عام 2000 في منتديات كثيرة على الانترنت.
فظيع انت فظيع عندك قدره عجيبة على السخرية من اوضاع كريهه بدرجة مضحكة لدرجة انك بتخلي الي بيقرالك يضحك لحد ما دموعه تنزل من الحزن والقهر والالم شعور عجيب بنضحك من الالم ونبكي برضه من الالم
ردحذفانت كنت بتكتب في جريدة ايه
ولا عمري كتبت في جرايد تقبل تحيتي ومودتي
ردحذف